Құрметті БАҚ өкілдері!
Қадірлі қалам ұстаған қауым!
Сіздерді кәсіби мерекелеріңіз — 28 маусым – Бұқаралық ақпарат құралдары қызметкерлерінің күнімен шын жүректен құттықтаймын!
Еліміздегі экономикалық, саяси және қоғамдық үдерістердің басында ұлттың үні, көзі мен құлағы болып, «Халық үніне құлақ асатын мемлекет» қағидатын жүзеге асыруда журналистер қауымының алар үлесі мол.
Егемен еліміздің даму тарихындағы сүйініші мен күйініші қатар кезеңдерде БАҚ өкілдері мемлекеттік саясаттың тізгінін тең ұстап, қоғамда орнықты ой-пікір қалыптастырып, халық пен билік арасындағы алтын көпірге айналды.
Ақпараттық майданда елдің жоғын жоқтап, қарашаның қамын ойлайтын Сіздердің еңбектеріңіз әрқашан халықтың көз алдында.
Бүгінгі мерекеде ойлы оқырман мен қырағы көрерменнің ақпаратқа деген сұранысына орай ел-халыққа талғамы биік, танымы терең хабар таратудағы қажырлы еңбектеріңіз үшін алғысымды білдіремін.
Тілшілік тіршіліктегі тынымсыз еңбектеріңіз бен нақты ақпарат жеткізу жолындағы үздіксіз ізденістеріңіз алдағы уақытта да бірлік пен татулық мекені — Ордабасы ауданының әлеуметтік-экономикалық, рухани-мәдени салада дамып, нығаюына қызмет етеді деп сенемін.
Осынау мерейлі мерекеде қаламды қару етіп, ұлттың рухани кеңістігінде ағартушылық бағытта халқымызға ақ, адал қызмет етіп келе жатқан барша бұқаралық ақпарат құралдары өкілдерінің шығармашылығына шалқар шабыт, отбасына амандық, бақ-береке, еңбектеріне жеміс тілеймін!
Тәуелсіз Отанымызда Сіздер сүйіншілейтін жағымды жаңалықтар көп болғай!
Ізгі ниетпен, Ордабасы ауданының әкімі Бағлан БАТЫРШАЕВ.
