Түркістан облысы әкімінің тапсырмасына сәйкес аудан, қалалардағы 200-ге жуық ауылдық округте жаппай тексеру жүргізілді. Мониторинг нәтижесінде 540 бейберекет күл-қоқыс орындары анықталды. Ескертуден кейін 300-ден астам қоқыс орындары тазаланған. Қалғаны қаз қалпында. Бұл туралы бүгін Түркістан облысының әкімі Өмірзақ Шөкеевтің төрағалығымен өткен апталық аппарат мәжілісінде баяндалды. Облыс басшысы барлық аудан, қала әкімдеріне бір апта уақыт берді. Жеті күннің ішінде тапсырманы орындамағандарға шара қолданылады.
– Күл-қоқыспен күресе алмасаңдар, басқа неге шамаларың келеді? тапсырманы орындай алмағандарға шара қолданылады, – деді облыс әкімі.
Тексеру қорытындысы бойынша ауылдық округтерде орналасқан полигондардың арасында талапқа сәйкес келмейтіндері де анықталған. Мәселеге қатысты жауапты сала басшылары тапсырма алды.
Жиналыста облыс бюджетінің атқарылуы мен облыстағы мүлік иелері бірлестігінің мәселелелері туралы соңғы мәліметтер ортаға салынды.
Түркістан облысы аумағында 1,5 мыңнан астам көппәтерлі тұрғын үй бар. Басым бөлігінде тұрғын үйге басқару органдары құрылды. Сонымен бірге аудан, қалалардағы 30 пәтерден асатын 300-ден астам тұрғын үйге мүлік иелерінің бірлестіктерін құру қажет. Бұл бойынша жол картасы әзірленіп, аудан, қала әкімдеріне тапсырма берілген.
Түркістан облысы әкімінің баспасөз қызметі
