Ордабасы аудандық орталық ауруханасында 1 маусым — балаларды қорғау күніне орай мерекелік іс-шара өтті.
Думанды мерекелік шараға аудан әкімінің орынбарасы Қыдырбай Сейтқұл мен аудандық Орталық аурухананың бас дәрігері Болатхан Сағымбеков қатысып, балаларға арнап ізгі тілектерін білдірді.
«Балалардың өмірін қорғау, денсаулығын сақтау, болашақ ұрпаққа демократиялық негізде білім мен тәрбие беру, болашақта адамгершілікке, әділдікке, баянды өмірге толы қоғам құру үшін — балаларға барлық жағдай жасау керек. Шын мәнінде балалардың әр күні мереке болуы тиіс», деді ауданның бас дәрігері.
Меркелік шара барысында емхананың бейінді мамандары балаларға қабылдау жүргізіп, медициналық кеңестер берді. Сондай-ақ, балалардың денсаулығына аса жауапкершілікпен қараған ата-аналарға Алғыс хаттар табыстады.
Балалар жылына арналған іс-шарада жасөспірімдердің көңіл-күйін көтеру үшін арнайы ойын түрлері ұйымдастырылып, көңілді концерттік бағдарламалар қойылды. Қызықты ойындар ойнатылып, жеңімпаздарға сый-сияпат таратылды.
«Жас толқын» үлгілі балалар мен жасөспірімднер театры балаларға мерекелік қойылым ұсынды.
Ордабасы ауданы әкімдігінің баспасөз қызметі
