Бүгін ҚР Президенті Әкімшілігінің мемлекеттік инспекторы Бахыт Жаханов ауданымызға іс-сапармен келді.
Сапар барысында Бахыт Дүйсенұлы аудан орталығы – Темірландағы мамандандырылған Халыққа қызмет көрсету орталығы мен Жұмыспен қамту орталығының жұмыс барысымен танысты.
Аудан әкімі Бағлан Батыршаев мемлекеттік инспекторға тұрғындарға цифрлы форматта қызмет көрсететін жаңа орталық пен жұмыссыздық деңгейін төмендету мақсатында құрылған Жұмыспен қамту мекемесінің атқарған жұмыстары жөнінде баяндады.
Бахыт Жаханов облыс деңгейінде халыққа мемлекеттік қызмет ұсынуда үлгілі ұжымның бастамаларына сәттілік тілеп, мекеме қызметкерлеріне аудан тұрғындарымен тығыз қарым-қатынаста жұмыс істеуге шақырды.
Мұнан соң мемлекеттік инспектор аудан басшысының жол бастауымен Бадамдағы «Аделя» жылыжай кешені мен сүт өндіруші «Бөрте милка» ЖШС-нің өндіріс орнын аралап, кәсіпорын жауаптыларымен пікірлесті.
Өндіріс орындарындағы күрмеуі шешілмей жүрген мәселелерді жергілікті билік пен орталық басқарушы органдар бірлесе талқылап, оңтайлы шешім қабылдау керектігін айтып өтті.
Іс-сапарда Бахыт Дүйсенұлы жылыжай кешенінің қияр өсіру алаңы мен «Бөрте милканың» сүт өндіріс орнында болып, Ресей мен алыс-жақын шетелдерге, республиканың облыс-қалаларына сүт өнімдері мен көкөніс экспорттайтын мекемелердің базасын аралап көрді.
Аудан басшысы қияр теру науқаны кезінде аудандағы жұмыссыз азаматтар маусымдық жұмысқа тартылып, Бадамдағы Қазақ-Түрік индустриялды аймағындағы өндіріс ошақтарына да ауыл жастары жұмысқа орналасып жатқандығын мәлімдеді.
Сондай-ақ, сапар барысында аудан әкімінің орынбасары Азат Оралбаев ҚР Президенті Әкімшілігінің мемлекеттік инспекторына аудандағы табиғи газ, күрделі жөндеуді қажет ететін каналдар, жайылымдық жерлер бойынша бірқатар мәселелерді баяндады.
Ордабасы ауданы әкімдігінің баспасөз қызметі
