Бүгін Түркістан облысына арнайы іс-сапармен келген ҚР Мемлекеттік қызмет істері агенттігінің төрағасы Дархан Жазықбаев Ордабасы ауданындағы бірқатар мемлекеттік қызмет көрсету мекемелерінің жұмысымен танысты.
Агенттік төрағасына аудан әкімі Бағлан Батыршаев Темірланда жаңадан ашылған мамандандырылған Халыққа қызмет көрсету орталығының жұмысы туралы баяндады.
«Мемлекеттік қызметті жаңғыртуда цифрлық жүйеге өту, жылдам, сапалы қызмет көрсету жағын өңірлерде жүйелей түсу қажет. Тұрғындарға қажетті қызмет түрін Халыққа қызмет көрсету орталықтарынан алуға барлық шарт-жағдай жасалу керек», деді Дархан Медеғалиұлы мекеме қызметкерлерімен кездесуде.
Аудан басшысы агенттік төрағасына аудандағы өсім-көрсеткіші жоғары ауылдарда да Халыққа қызмет көрсету орталығының бөлімшелерін ашуға қажеттілік туындап отырғандығын жеткізді.
Сондай-ақ, ауылдардағы халықтың санына қарай құқық қорғау органдары қызметкерлерінің штаттық санын көбейту жағын мәселе ретінде айтып өтті.
Өз кезегінде Дархан Медеғалиұлы аталған мәселелерді назарға алып, өңірлердегі қордаланған түйіткілдердің оңды шешілуіне ықпал ететіндігін тілге тиек етті.
Сапар барысында ҚР Мемлекеттік қызмет істері агенттігінің өкілдері Қажымұқан Мұңайтпасұлы атындағы облыстық спорт музейіне барып, даңықты балуанның өмір деректерінен сыр шертетін құнды мұраларға қанықты.
Ордабасы ауданы әкімдігінің баспасөз қызметі
