Аудан әкімі Бағлан Батыршаевтың тапсырмасына орай Бөржар ауылдық округіне қарасты Қайнар елді мекенінде аудан шаруаларына биогумус органикалық тыңайтқышын өндірудің қыр-сырын үйретуге арналған семинар кеңес өтті.
Калифорниялық шылаушын арқылы биогумус өндіру бойынша ұйымдастырылған мастер-класқа Алматы, Ақтөбе қалалары мен облысымызға қарасты барлық аудан-қалалардан, ауылдық округтен 100-ден астам шаруа қатысты.
Аудан әкімінің орынбасары Азат Оралбаев шаруалардың тұрмыс деңгейін арттыруға арналған семинар жұмысына сәттілік тілеп, аудан тұрғындарын аталған кәсіп түрімен үй жағдайында айналысуға шақырды.
Сондай-ақ, Қайнар елді мекеніндегі Бақытжан Әсембековтың кәсібімен танысып, жұмыссыз азаматтардың өзін-өзі жұмыспен қамтуында үй шаруашылығы секторында үй іргелік жер телімінде кәсіптің осы түрімен шұғылдануға үгіттеді.
Кездесуде сала мамандары биогумус бизнесі бойынша өздерінің көп жылдық тәжірибесімен бөлісіп, қатысушыларға кәсіпті қалай бастау керектігін егжей-тегжейлі баяндап, оның қыр-сыры бойынша толық ақпарат берді.
«Жұмыспен қамту орталығы арқылы берілетін грант алушыларға осы жобаны енгізіп, халықтың әлеуметтік жағдайын жақсартуға және облыс деңгейінде пилоттық жоба етуге жұмыс жүргізуіміз қажет», дейді аудандық Кәсіпкерлік бөлімінің басшысы Фатима Қайымқызы.
Бүгінде биогумусқа қажетті шикізат ауыл тұрғындарының ауласынан көптеп табылады.
Енді соны кәдеге жаратып, төрт түліктің көңіне шылаушын қосып, қарашірік — органикалық тыңайтқышқа айналдыру арқылы егістік жердің құнарын арттыруға болады.
Бұл бірінші кезекте шеттен келетін химиялық тыңайтқыштардың орнына шаруалар өздері өндірген отандық тыңайтқышты пайдалануға мүмкіндік бермек.
Қазіргі таңда аудан көлемінде 15-ке жуық азамат осы шаруашылықпен айналсуда.
Аудан әкімінің тапсырмасына орай болашақта бұл кәсіп түрін ауданымыздың барлық ауыл, елді мекендерінде жүзеге асыру кзделуде.
Калифорния қызыл құрттары — ауыл шаруашылығында таптырмайтын құрал.
Ордабасы ауданы Бөржар ауыл округі, Қайнар елді мекенінде жеке кәсіпкер Бақытжан Әсембеков Калифорния қызыл құрттарының басын көбейтіп, биогумус өнімін яғни органикалық таза тыңайтқыш өндіруде.
Кәсіптің бұл түрімен шұғылдану өте қарапайым басты артықшылығы — калифорниялық құрттарды жеке үй шаруашылығында өсіруге болады.
Қоршаған ортаға зияны жоқ бұл кәсіпте ең үлкен ұтыс жердің құнарлылығы артып, өнім алу көлемі артады. Химиясыз, топырақ 3 жыл құнарлығын сақтайды, арамшөп шықпайды.
Калифорния қызыл құрттарының өмір сүру ұзақтығы 15 жыл. Көбеюі 2 аптада 1 кокон, одан 8-10 малюска пайда болады. Өте төзімді, тез көбейеді, өсімтал.
Ордабасы ауданы әкімдігінің баспасөз қызметі
