Аудан орталығы Темірланда аудандық Халықты жұмыспен қамту орталығының ұйымдастыруымен «Нәтижелер» жәрмеңкесі өтті.
Шараға аудан әкімі Бағлан Батыршаев қатысып, ауылдық округтер мен елді мекендерден келген кәсіпкерлердің көрмеге қойылған жұмысымен танысты.
Көрмеге жастар практикасынан соң тұрақты жұмыс орынына орналасқан 3 азамат, әлеуметтік жұмыс орындарына қатысушы 3 азамат, қысқа мерзімді оқу курсының 2 түлегі, атаулы әлеуметтік көмек алушылар арасынан өз кәсібін ашқан 3 азамат, грант алган 18 кәсіпкерді қосқанда жалпы 29 азамат қатысып, өз жұмыстарын көрсетті.
«Жұмыспен қамту орталығы тек қағаз жүзінде мәлімет берумен ғана шектелмей, ауыл, елді мекендерді аралау керек. Грант беріп ғана қоймай, оның өз мақсатында игерілуін де қадағалау тиіс. Жұмыс барысында мемлекеттік бағдарламаның арқасында табысын еселеген азаматтардың еңбегін көпке үлгі ету керек. Бұл бірінші кезекте Жұмыспен қамту орталығы мен кәсіп ашуға ниетті азаматтардың арасында тығыз байланыс орнатады», — деді аудан әкімі өз сөзінде.
Жәрмеңкеге «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы бойынша жаңа бизнес идеяларға арналған грант алған, қысқа мерзімді оқу курсы бойынша мамандық иегері атанып, кәсібін дөңгеленткен азаматтар, жастар практикасының қатысушы түлектері, Әлеуметтік жұмыс орындарына қатысушы жұмыс берушілер аудан тұрғындарына өз өнімдерін ұсынды.
Естеріңізге салар болсақ, биыл аудан көлемінде кәсіп бастаймын деген 173 азаматқа мемлекеттік грант берілу жоспарланған.
Ордабасы ауданы әкімдігінің баспасөз қызметі
