Білім саласының аты өзгерді. Адами әлеуетті дамыту деп. Бұдан не ұттық. Жоқ әлде жаһандану немесе жаңғыру дегеніміз осы ма? Облыстағы білім саласының мектептері, мектепке дейінгі және мектептен тыс мекемелерінің мөрі мен Жарғысы өзгертілді. Мұның бәрі мемлекет үшін қаншама шығын.
Бұл мекеменің ертеректегі оқу бөлімі, кейіннен білім бөлімі атауының кімге ұнамағаны да белгісіз. Осы білім бөлімі тиянақты да түсінікті секілді көрінеді.
Аталған сала аудан әкімінің білдей бір бөлімі еді. Бұл сала да 2021 жылдың қаңтарында облыстық білім (қазіргіше адами әлеуетті дамыту) басқармасына бағынысты мекеме болып қалды. Әлі есімізде, осылай болу керек деп бұдан оншақты жыл бұрын бір кісі мәселе көтерген еді. Сол кісінің ұсынысы өткен жылы орындалды. Мұндай бастама көтерушілер төменгі буынның, ауыл мен аудан әкімшілігінің жұмыстарын түсінбейді деп ойлаймын. Сол қате ұсыныстың зардабын енді аудандағы білім саласының қызметкерлері көріп отыр.
Неге дерсіз: мұғалім де, оқушылар мен бала бақша тәрбиеленушілері де сол ауылдың, сол ауданның тұрғындары. Облыста қанша мектеп бар?! Оларда қандай өзекті мәселелер бар? Облыстық сала басқармасы осыларды зерттеп, зерделеп, оның себептері мен салдарын нақты айқындай ала ма?
Аудан әкімшілігі білім саласының жаңа оқу жылына, қысқы маусымға дайындықтарын көріп, талдап, жіберілген кемшіліктерді жою жөнінде нақты ісшаралар жасайтын. Бәрібір қазірдің өзінде оқушылардың білім сапасына, тәрбиесіне, қысқасы бәріне мектеп басшысы мен аудан әкімдері жауапты.
Қазір Ордабасы ауданында ұлттық бірыңғай тест тапсыратын орталық жоқ. Жабылып қалған. Осы бір солақай шешімге оқушылардың, мұғалімдердің не кінәсі бар? Оның кесірі кімдерге тиіп жатыр. Әрине мектеп бітіруші түлектер мен ата-аналарға. Биылғы түлектер Шымкент қаласындағы тест орталықтарына бөлініп тасталған. Байқау тесттерін оқушылар Шымкенттегі әр түрлі жоғарғы оқу орнында тапсырып жатыр.
Ата-ана баласы үйге аман-есен келгенше алаңдаулы. Ата-ана бұл мәселеге шағымданып Түркістанға бара алмайды. Осылайша әрі-сәрі күн кешуде. Ал, білім бөлімі ауданға қарасты болса, бұл мәселе аудан әкімі арқылы тиісінше шешілер еді.
Бүгінгі айтылар ой-пікірді осымен тоқтатайын.
Бұл жөнінде Сіздің ойыңыз қалай?
Ғалымжан ЗИЯБЕК,
аудандық мәслихаттың депутаты.
