Ордабасы ауданының ауыл шаруашылығын дамытудағы маңызды бағыттардың бірі – егістік жерлерді суармалы сумен қамтамасыз ету. Суармалы жүйелердің дамуы мол өнім алудың басты факторы болып табылады және ауыл шаруашылығының тұрақтылығын қамтамасыз етеді.
2025 жылы аудан аумағында 9 негізгі каналға күрделі жөндеу жұмыстары жүргізілуде. Атап айтқанда, Төрткөл ауыл округінен “Р-11-С”, “Р-11-К”, “Р-12” каналдары, Бөген ауыл округінен “ЛБК”, “Р-1”, Қажымұхан ауыл округінен “Найман”, “Қазыналық”, Жеңіс ауыл округінен «Р-6», Қараспан ауыл округінен “Қараспан” магистралды каналдары күрделі жөндеуден өтуде. Қазіргі таңда “ЛБК” және “Р-11-С” каналдарының құрылысы аяқталып, “Қараспан” магистралды каналы аяқталуға жақын.
Суармалы жүйелерді жетілдіру аясында механикалық тазалау жұмыстары да жүргізілді. Ағымдағы жылдың көктем және күз айларында 51 каналдың 132 шақырымына механикалық тазалау жұмыстары жүзеге асырылды. Бұл жұмыстар судың тиімді таратылуына және егістік алқаптардың толық суарылуына мүмкіндік береді.
Су үнемдеу технологиялары да маңызды рөл атқарады. 2030 жылға дейін 15 891 гектар жерге су үнемдеу жүйелерін енгізу жоспарланып отыр. Бүгінгі таңда ауданда – 6 925 гектар жерге су үнемдеу жүйелері енгізілген. Ағымдағы жылы 73 шаруа қожалығы 1 595 гектар жерге тамшылатып және жабырлатып суғару технологияларын пайдаланды. Мысалы, Жеңіс ауыл округінен «ПК Дала» АӨК 650 гектар жерге тамшылатып суғару әдісімен мақта дақылын егіп, гектарына 45 центнерден өнім алды.
Су үнемдеу технологиялары тек суды үнемдеумен ғана шектелмейді, сонымен қатар мол және сапалы өнім алуға кепілдік береді. Заманауи әдістерді қолдану арқылы Ордабасы ауданының шаруалары су ресурстарын тиімді пайдаланып, өнім көлемін арттыруда.
Қорытындылай келе, Ордабасы ауданының суармалы жүйелерін дамыту жұмыстары – ауыл шаруашылығы өнімділігін арттыру, су ресурстарын үнемді пайдалану және ауыл шаруашылығының тұрақты дамуын қамтамасыз етуге бағытталған стратегиялық іс-шара болып табылады.
