Лудомания – адам өмірінде негативті тұрғыдан басым рөл ойнайтын, әлеуметтік, кәсіби, материалдық тұрғыдан және отбасылық құндылықтардың төмендеуіне әкелетін патологиялық ойын құмарлығы. Азарт адамдарды тек материалдық шығынға ұшыратқан жоқ, сондай-ақ рухани тұрғыда да әбден азғындатты.
Лудомандар – құмар ойынның шырмауына түскен адамдар. Казино мен букмекерлік компаниялар жұмысы барынша қарқынды дамыған кезден бері «лудомания» деген термин кеңінен қолданыла бастады. Аурулардың халықаралық классификациясы бойынша лудомания аурулар тізіміне енгізілген. Құмар ойынның соңына түскендер дүние-мүлкінен айырылғаны өз алдына, ажырасып, дымсыз қалып жатады. Мұндай жағдай Қазақстан қоғамына да таңсық емес. Ойынқұмарлардың көбеюі салдарынан елімізде лудомандарды емдейтін арнайы орталықтар да ашылған. Денсаулық сақтау министрлігінің ұсынған ақпараттарына сенсек, елімізде ойын құмарлықтан жапа шеккендердің саны отыз алты мыңнан асып жығылады.
Осыған орай, Сарыағаш қаласы орталық саябақ аумағында жастарға Сарыағаш «Жастар ресурстық орталығы » КММ-нің психологы Светлана Жаржановамен бірлесіп түсіндірме жұмыстары жүргізілді. Іс-шараның негізгі мақсаты- жастарды ойынқұмарлыққа жол бермеу, букмекерлік кеңселердің зияны жайында сөз қозғалды. Кездесу барысында психолог Светлана Жаржанова сөз алып, лудомания мәселелерін насихаттады. Адам өмірін құртатын, бүгінгі таңда қоғам өмірінде орын алып жатқан құбылыстарға немқұрайлы қарамауын айтты.
