Жастардың бос уақытын тиімді ұйымдастыру, құқықбұзушылықтың алдын алу және пробация қызметі есебіндегі тұлғалардың қайта қылмысқа бару қаупін төмендету мақсатында, «Жастар ресурстық орталығы» КММ-нің ұйымдастыруымен Арыс аудандық сотының төрағасы С.Умаровтың қатысуымен «BIR TOLQYNDA» атты мотивациялық кездесу өткізілді.
Іс-шараға қала әкімінің орынбасары Е.Қуандық, «Ішкі саясат бөлімі» ММ басшысы Ғ.Садықов, Арыс аудандық полиция бөлімі инспекторлары, колледж студенттері мен пробация қызметінің есебіндегі жастар қатысты.
Кездесу барысында жастар мен құқық қорғау органдары арасында еркін пікір алмасу алаңы құрылып, сот жүйесінің қызметі мен мемлекеттік қызметтің маңызы жайында кеңінен сөз қозғалды. Аудандық сот төрағасы С.Умаров өз кәсіби тәжірибесімен бөлісіп, адалдық, жауапкершілік пен үздіксіз даму жайында жастарға мотивациялық бағыт берді.
Кездесу соңында қатысушылар өздерін қызықтырған сұрақтарға толық жауап алып, болашаққа сеніммен қарауға серпін алды.
