26-маусым – Халықаралық нашақорлыққа және есірткі бизнесіне қарсы күрес күніне орайластырылып, «Қазақстан Республикасында нашақорлыққа және есірткі бизнесіне қарсы іс-қимылдың 2023–2025 жылдарға арналған Кешенді жоспарын» жүзеге асыру мақсатында Түркістан қаласында бұқаралық жүгіру марафоны өтті.
Аталған іс-шараны Түркістан облысы әкімдігі, Полиция департаменті және Спорт және дене шынықтыру басқармасы бірлесе ұйымдастырды. Мақсат – салауатты өмір салтын қалыптастыру, жастарды спортқа баулу және есірткіге қарсы қоғамдық иммунитетті нығайту.
Марафон 2025 жылғы 17 маусым күні таңғы сағат 09:00-де Түркістан қаласындағы «Тікұшақ алаңынан» басталып, Б.Саттарханов даңғылы бойындағы «Флагшток» алаңына дейінгі 4 шақырымды қамтыды. Шараның басты ұраны – «Есірткісіз болашақ!».
Марафонға 200-ден астам қала тұрғындары мен қонақтары белсене қатысып, өздерінің салауатты өмір салтына деген бейілділігін көрсетті. Іс-шара соңында Полиция департаментінің басқарма басшылығы қатысушыларға есірткіден аулақ болуға, спортпен тұрақты шұғылдануға үндеді.
Жүлделі орындарға ие болған қатысушылар Полиция департаментінің бағалы сыйлықтарымен және Департамент басшылығының арнайы дипломдарымен марапатталды.
Бұл марафон – есірткіге қарсы күресте қоғам болып жұмылып, жастардың бойында дені сау, белсенді өмір салтын қалыптастырудың жарқын үлгісі болды.
