Жуырда Түркістан облысында өңірлік нышанын әзірлеу мақсатында конурс жарияланғаны белгілі. Осыған сәйкес сәулетші, дизайнер, суретші, өлкетанушы, тарихшылардан құралған жұмысшы топ құрылды. Бүгін облыс әкімінің орынбасары Ертай Алтаевтың төрағалығымен жиын өтті. Онда жұмысшы топ өкілдері байқауға қатысқан үміткерлердің жобасын саралап, өз ұсыныстарын ортаға салды.
Жалпы Түркістан облысының жаңа логотипіне ұйымдастырылған конкурсқа 11 автор қатысып, 44 жоба ұсынылды. Солардың ішінен үздіктер комиссия мүшелерінің дауыс беруі арқылы анықталады.
Ұйымдастырушылар талабы бойынша, өңірлік нышан жобасы бұрын қолданылмаған, ерекше әрі жергілікті жердің болашақ даму бағытын көрсететін жаңа жұмыс болуы тиіс. Ең негізгі талаптардың бірі ұлттық этнографиялық элементтерді, ою-өрнектерді пайдалануға рұқсат етіледі. Қазақстан Республикасының Мемлекеттiк Туы мен Мемлекеттiк Елтаңбасының бейнесін, сондай-ақ дiни, рулық және тайпалық белгiлердiң бейнесін пайдалануға тыйым салынады.
