Түркістан облысы қоғамдық даму басқармасы “Жастар ресурстық орталығы” КММ-нің ғимаратында ел болашағына бей-жай қарамайтын белсенді жастардың басын қосқан маңызды кездесу өтті. Жиын барысында Президенттік жастар кадр резервінің мәні мен мақсаты кеңінен түсіндірілді.
Бұл жоба — білімі мен біліктілігі жоғары, басқарушылық қабілеті мықты жас мамандарға арналған мүмкіндік. Бағдарлама арқылы жастар кәсіби дамуға, жаңа тәжірибе алуға және мемлекеттік басқару ісіне белсенді араласуға жол аша алады.
Кездесуде ҚР Мемлекеттік қызмет істері агенттігінің Түркістан облысы бойынша департаменті басқармасының басшысы Амандық Нұрлан қатысушыларға резервке іріктеу тәртібі мен талаптары жайлы толық ақпарат ұсынды. Сонымен қатар, облыстық “Жастар ресурстық орталығы” КММ басшысының орынбасары Пердебек Сержанұлы жергілікті деңгейде түсіндіру жұмыстары жүргізілетінін жеткізді.
Іріктеуге өтінімдер 1–30 маусым аралығында pkrezerv.gov.kz сайтында қабылданады.
Жастар үшін жаңа мүмкіндіктер алаңы — Президенттік жастар кадр резервіне қатысып, өз әлеуетіңді дәлелде!
