Түркістан облысында жазғы шомылу маусымына дайындық жұмыстары басталып кетті. Басты мәселе – су айдындарындағы қауіпсіздік шараларын күшейту. Қайғылы оқиғалардың жиі орын алуына азаматтардың қарапайым қауіпсіздік талаптарын сақтамай, белгіленбеген орындарда шомылуы себеп болып отыр. Бұл туралы Түркістан облысы Төтенше жағдайлар департаментінің Азаматтық қорғаныс басқармасының бастығы Оразгелді Дүйсен брифингте мәлімдеді.
«2024 жылы түрлі жағдайларда 60 адам суға батып қайтыс болды, оның 31-і балалар. Сондай-ақ, ТЖД есепке алу критериіне сәйкес шомылу барысында қаза тапқан 16 адамның 5-і кәмелет жасына толмаған. Биыл шомылу маусымы басталмай жатып түрлі жағдайларда 12 қайғылы оқиға орын алып үлгерді»- деді спикер.
Жалпы 2024 жылы облыс аумағындағы шомылатын орындар саны 30-ға жеткен. Бұл көрсеткіш 2023 жылмен салыстырғанда 5 есеге көбейгенімен, 2 млн-нан астам тұрғыны бар өңірге аздық ететінін айтты Оразгелді Нұрмаханұлы. Бүгінде бұл мәселені шешу бойынша өңірге инвесторларды тарта отырып, Аквосаябақтар ашу бойынша ұсыныстар жасалынуда.
