Бұл туралы облыстық Мемлекеттік кірістер департаменті басшысының орынбасары Ерлан Тұрысов мәлімдеді.
«Түркістан облысында Мемлекеттік кірістер департаментімен өткен жылы мемлекеттік бюджетке 775 млрд теңге салықтық түсімдер түсіп, бекітілген жоспар 100%-ға орындалған. Сондай-ақ, салықтық және кедендік әкімшілендіру жұмыстарын жүргізу нәтижесінде 36 млрд теңгеге жуық қосымша кіріс көздері анықталып, өндірілді. Мемлекеттік кірістер органдары өз құзіреті шеңберінде салық және кеден заңнамаларының сақталуына бақылау жұмыстарын да атқара отырып, көлеңкелі экономикамен күрес жүргізеді. Мәселен 2024 жылы кедендік бақылау бойынша жалпы салмағы 90,92 грамм заңсыз есірткі заттарын алып өтудің 69 дерегі анықталды. Сондай-ақ, мұнай өнімдерін заңсыз әкетудің 259 дерегі анықталып, оларға сотпен 12,1 млн теңге айыппұл салынды. Бұдан бөлек, 223 мың АҚШ доллары сомасында валютаны заңсыз әкетудің 44 дерегі тіркелді. Сонымен қатар, 529 салықтық құқықбұзушылық анықталды. Оның ішінде, 289-ы бақылау-касса машинасын қолданбағандар, 135-і жеке кәсіпкер ретінде тіркелмей кәсіпкерлік қызметпен айналысқандар, ал 61-і pos-терминал қолданбағандар, 44-і лицензиясыз алкоголь өнімдерін сатқандар»,- деді спикер.
Облыс бойынша 2024 жылы 2 млн 726 мыңнан астам мемлекеттік қызмет көрсетілген. Қызметтердің сапасын арттыру үшін облыстың 17 аумақтық басқармалары мен 8 кеден бекеттерінде қызмет көрсету орталықтары үнемі департамент тарапынан қатаң бақылауда. Сонымен қатар, департаменттің 1414 бірыңғай байланыс орталығы арқылы 31 мыңнан астам салық төлеуші қызмет алған.
