Бүгінгі күнгі қоғамның алдында тұрған басты міндеттердің бірі — балалар мен жасөспірімдер арасындағы өзекті мәселелердің алдын-алу, өз-өзіне қол жұмсау, суицид сезімдерінің алдын алу, кәмелетке толмағандар арасындағы қылмыстың өсуіне жол бермеу.
Сауран ауданы, Шорнақ ауылдық округіне қарасты «А.Байтұрсынұлы» атындағы жалпы білім беретін мектебінде кәмелеттік жасқа толмаған жасөспірімдер арасындағы құқық бұзушылықтың алдын алу мақсатында білім беру ұйымдарының қызметкерлері, ата-аналар мен жоғары сынып оқушыларының қатысуымен кездесу өтті.
Жиынға Сауран ауданының прокуроры Асылбеков Алмаз Әбдінұрұлы, Сауран аудандық білім бөлімінің әдіскері Сералиевна Мадина, Сауран ауданы «Жастар ресурстық орталығы» КММ-нің теолог маманы Ажибай Дияна Дилмуратқызы қатысты.
Кездесудің күн тәртібінде «Құқықбұзушылық профилактикасы туралы» т.с.с. баяндамалар оқылып, лудомания, нашақорлық, өз-өзіне қол жұмсау, суицид сезімдерінің алдын алу, жастардың діни сауаттылығын арттыру және экстремизмнің алдын алу мәселелері туралы кеңінен айтылып, түсіндірме жұмыстары жүргізілді. Ата-аналар және мектеп оқушылары мамандарға өздерінің көкейтесті сұрақтарын қойып, толық жауаптарын алды.
