Түркістан облысының полиция департаментінде интернет-алаяқтық қылмыстарын ашу және тергеу, киберқылмысқа қарсы күрестің тиімділігін арттыру, жедел уәкілдер мен тергеушілердің жұмысын жақсарту мәселелері бойынша семинар-кеңес өтті.
Семинарға Шымкент қаласы Адвокаттар алқасының заңгері Алмас Сәрсенбек, киберқылмысқа қарсы іс-қимыл басқармасы бастығының міндетін атқарушы Ермек Шәкім, Түркістан қаласы ПБ киберқылмыстарды тергеу бөлімінің бастығы Жақай Жамбыл, қалалық және аудандық полиция бөлімшелерінің тергеушілері мен жедел уәкілдері қатысты.
Жиын барысында Қазақстан Республикасы Азаматтық кодексінің 953 бабы негізсіз байлықты қайтарудың негіздеріне ерекше назар аударылды. Сондай ақ интернет-алаяқтық қылмысын тергеу алгоритмдері талқыланды.
Кездесу қорытындысы бойынша киберкеңістікте азаматтарды сенімді қорғауды қамтамасыз ету және полицейлер жұмысының тиімділігін арттыру мақсатында тергеудің жаңа тәсілдері талқыланды.
Қазіргі заманның індетіне айналған интернет-алаяқтық қылмыстары халқымызға елеулі зиян келтіріп жатқандығы барлығымызға белгілі.
Елімізде соңғы жылдары интернет-алаяқтыққа қатысты қылмыстардың саны күрт өсуде. Осы орайда Түркістан облыстық полиция департаменті тарапынан арнайы «CyberPol» тобы құрылған.
«Статистикаға сәйкес, 2024 жылдың 10 айының қорытындысымен облыс көлемінде интернет-алаяқтық бойынша 454 іс тіркелсе, оның 196 – сы сотқа жолданған. Аталған саладағы қылмыстардың ашылу пайызы – 44,5%. Сонымен қатар, 2024 жылдың 1 қарашасынан бастап ІІМ-де интернет-алаяқтықпен күресті тиімді жүргізу мақсатында киберқылмысқа қарсы күрес департаменті құрылды. Алдағы уақытта біздің өңірде осындай дербес басқарманы ашу бойынша жұмыстар атқарылуда. Сондай-ақ, арнайы мақсаттағы топтың әлеуметтік желілерде парақшалары ашылды. Бұдан былай алаяқтардың құрбанына айналған азаматтар әлеуметтік желілердегі парақшаларымызға анонимді түрде өз арыз-тілектерін жолдай алатын болады»-дейді Түркістан облысы Полиция департаменті өкілі.
Аталған тақырыпты өз сөзінде Мемлекет басшысы Қасым-Жомарт Кемелұлы Тоқаев интернет және телефон арқылы жасалатын алаяқтық әрекеттерге айрықша назар аудару қажеттігін атап көрсеткен.
Интернет-алаяқтық қылмыстардың алдын-алумен күресудің басты шешімдерінің бірі профилактикалық іс-шаралар, қауіпсіздік шаралар мен бейне роликтер жариялау, облыстық және жергілікті бұқаралық ақпараттық құралдарында жариялау, баннерлер мен билбордтарды қоғамдық орындарға ілу яғни, халықтың қаржылық сауаттылығын арттыру мен жан жақты хабарландыру мен ақпараттық насихаттық жұмыстарды жүргізу болып табылады.
Түркістан облысы Полиция департаментінің әзірленген «Интернет алаяқтық қылмысынан сақ болыңыздар жадынамасымен танысып,халқымызды сақ болуға шақырамыз.
