Жұмабек Ахметұлы Тәшенев атындағы унверситеттің ректорат мүшелері Қазақстан Республикасының Президенті Қасым-Жомарт Тоқаевтың «Әділетті Қазақстан заң мен тәртіп, экономикалық өсім, қоғамдық оптимизм» атты Қазақстан халқына Жолдауын ұжым болып тыңдады. Мемлекет басшысының сөзі әділетті қоғам құру мәселесінен өрбіп, қазақ қоғамындағы еңбекқор адамды қалыпастырудың сан-қилы аспектілерін қамтыды. Адал еңбек пен адал қоғам сипаты заң мен тәртіпті сақтайтын, қай салада қандай жұмыс атқармасын отаншылдық, мемлекетшілдік тұрғысынан ғана іс атқаратын адамның болмысымен айқындалатыны анық. Қатардағы мамандарға құрмет көрсетілуі керек, адал еңбек бағалануы тиіс. Сол себепті мемлекет басшысы келесі жылды «Жұмысшы мамандықтар жылы» деп жариялады.
Білім беру саласында үнемі сапалы білім алуды басты назарда ұстау шарт екенідігін айтты. Білім мен ғылым саласын интернационализациялау, әлемнің үздік оқу орындарының тәжірибелерін игеру жаңа бағытта жалғасын табуы керек екендігін шегеледі. Қазір мемлекетімізде қолға алынған шетелдік мекемелер мен оқу орындарында біліктілікті арттыру, тағылымдамадан өтудің түрлі бағадрламаларын «академиялық туризмге» айналдырмауға тиіс екендігін ескертті. Президент «Ұстаздар – ұлттың зияткерлік қуаты» дей келе, қандай технологияны әкелмейік, қандай жағдайды туғызбайық, ұстаз білікті болмаса, барлығы бекер» деп түйіндеді.
Мемлекет басшысы қоғамда еңбекқорлық, кәсібилік дәріптелу шарт дегенге баса назар аудартты. Жұмабек Тәшенев атындағы университет ұжымының да мақсаты – кәсіби шеберлік. «Еңбек – барлық қиындықты жеңбек» деп дана халқымыз айтқандай, шәкірттерді адал еңбек етіп, адал табыс табуға, адал қоғам құруға бағыттау – Президент жолдауының негізгі өзегі. Оқу ордамыз осы биік межеден көрінуді өзіне міндет етіп қойды.
Амангелді МАМЫТ,
Ж.Тәшенев атындағы университеті
филология факультетінің деканы.
