Президент Қазақстан халқына арнаған Жолдауында Үкіметке коммуналдық инфрақұрылымды жаңғыртуды тапсырды, «Жергілікті өзін-өзі басқару мәселелеріне, қоғамдық кеңестердің, пәтер иелері кооперативтері мен мүлік иелері бірлестіктерінің қызметін өзгертуге айрықша назар аудару қажет. Тұрғын-үйлер мен қала инфрақұрылымын абаттандыру мәселесін қолға алу керек», деген болатын.
Түркістан қаласында жол сапасын жақсарту мақсатында бірнеше ірі жобалар дайындалды. Бүгінде жобалар аясында жол құрылысы қарқынды жүргізілуде.
Атқарылған жұмыстардың көрсеткішіне тоқталар болсақ, жыл басынан бері 10 көше орташа жөндеуден өтіп үлгерген. Олар: Шалкиіз Жырау, Марқасқа жырау, Қазтуған жырау, Сарқырама, Жерұйық, Ақтанберді жырау көшелері мен Асан қайғы — А.Юсупов аралығындағы көше, Гаухар ана көшесі (сарқынды су жүйесі аяқталған аумағы), А.Юсупов көшесі, Әйтеке би көшесінің тұйығы.
Қазіргі уақытта аталған жұмыстар Меркі — Шәуілдір тас жолы аралығында, Асан қайғы өткелінде, Асан қайғы — А.Юсупов аралығындағы көше мен Ғ.Мүсірепов, Ж.Еділбаев, Ғ.Мұратбаев — Әйтеке би аралығындағы көшелерде жалғасуда.
Одан бөлек, жыл басынан бері 86,3 шақырымды құрайтын 111 көшеге тас төселіп үлгерсе, 9 көшеде тас төсеу жұмыстары жүргізілуде. Сондай-ақ шаһарда кең жолақты бірнеше көшеде күрделі жөндеу жұмыстары жасалуда.
Атап айтқанда, Қазыбек би — О. Жарылқапов аралығында жаяу жүргіншілер жолы салынып, жол жиектастары, суағар науалар орнатылуда. Инфрақұрылым жүйелерінің орны ауыстырылып, асфальт төсеу үшін жол негізі әзірленуде.
Қазыбек би мен І.Қожабаев көшелері толық реконструкциялаудан өтуде. Қазыбек би көшесінде тұрғындар сұранысы бойынша көпір салынса, І.Қожабаев көшесіндегі құрылыс жұмыстары аяқталуға жақындаған.
Қазіргі таңда, биылғы жоспарға түзілген 94 көшеге (89,6 шақырым) асфальт төсеу үшін коммуникация жүйесі толық жүрген, топырағы табиғи тапталу кезеңінен өткен көшелерде жол негізін дайындау жұмыстары атқарылуда.
Сонымен бірге, кешкі лездемелік мәжілісте қала әкімі Нұрбол Тұрашбеков жоспарланған жұмыстардың атқарылу сатысын саралады.
2024-жылы облыс орталығында 94 көше орташа жөндеуден өтеді. Кәріз жүйесінің құрылысы аяқталған, топырақ жабындысы табиғи тапталу кезеңінен өткен көшелерге биыл асфальт төселеді. Сонымен қатар, қала әкімінің орынбасары Байдулла Оразбеков қазылған көшелерге тас төсеу барысы туралы да баяндады.
Құрылыс бөлімінің басшысы Нұркен Нақбаев инженерлік инфрақұрылым желілерін тарту мен абаттандыру нысандарының құрылысы өндірістік кестеге сай атқарылып келетінін жеткізді. Сондай-ақ, рәсімделу сатысындағы жобалау-сметалық құжаттарға тоқталды.
“Таза Қазақстан” республикалық акциясы аясында атқарылған тірліктер туралы қала әкімінің орынбасары Мекенхан Қырықбаев есеп берді. “Жасыл аймақ” апталығының жоспарын ұсынып, жетекшілік ететін салаларына қатысты тапсырмалардың орындалуын баяндады.
Мәжіліс барысында Нұрбол Әбдісаттарұлы жауапты мамандарға ұйымдастыру-инспекторлық бөлімнің тарапынан жүргізілген мониторинг нәтижесінде анықталған кемшіліктерді жедел әрекетке көшіп жоюды тапсырды.
