Жеңіл жолмен ақша табуға қызыққан жандар қаржы пирамидасының қақпанына оңай түседі. Себебі, тез баюға деген құмарлық қаржы пирамидасына ақша салуға деген ынтасын арттырып, орға жығады. Бұл қылмыстық ұйымдар ақыр соңында ешкімге ақшасын қайтармайтынын көзі ашық, көкірегі ояу жандар жақсы біледі. Қаржы пирамидалары адамдарды арбаудың небір айла-шарғыларын меңгерген. Қазіргі таңда олар әлеуметтік желіге көшті. Жарнамалық сайттарында түрлі бейнероликтер мен фотосуреттер жариялап, «Мол табыс табасыз»-деп өздеріне имандай сендіріп, тұзақтарына тартып отырады. Қазақстанда қаржылық пирамидалар қызметіне қатаң тиым салынған. Бұл ұйымдарды жарнамалауға да тосқауыл қойылған. Осыған қарамастан «Оңай олжаға кенелтемін»-деп алдап шақырып, халықты шығын батпағына батырып, олар естерін жинап, құқық қорғау ұйымдарына жүгінгенше жабылып тынады. Бәрінен де сорақысы, «Қара ниетті пирамидалар» қарапайым жұрттың жалғыз баспанасын я көлігін саттырып, уәде еткен қаржының көлеңкесінде көрсетпей қашады. «Оңай олжа орға жығады» демекші халықты «Табысқа кенелтемін» деген алаяқтардың құрғақ уәделеріне сенбеуге шақырамыз.
Қаржы пирамидасына тап болсаңыз, не істеу керек
Егер сіз қаржы пирамидасына тап болғаныңызды сезсеңіз, бірден полицияға хабар беріңіз. Сондай-ақ Қаржы нарығын реттеу және дамыту агентігіне, Қаржы мониторингі агенттігіне шағымдануға болады.
Қазақстанда қаржы пирамидасын құрғандар қылмыстық жауапқа тартылады. Дәлірек айтқанда, Қылмыстық кодекстің 217-бабы «Қаржылық (инвестициялық) пирамиданы құру және оған басшылық ету» бойынша үш жылдан он жылға дейін бас бостандығынан айыру жазасы көзделген.
Сонымен қатар, қаржылық пирамида қызметiн жарнамалағаны үшін Әкімшілік құқықбұзушылықтар туралы кодекстің 150-бабында айыппұл түрінде әкімшілік жауапкершілік қарастырылған:
жеке тұлғаларға – 150 АЕК немесе 2024 жылы – 553 800 теңге;
лауазымды адамдарға – 170 АЕК немесе 627 640 теңге;
шағын кәсiпкерлiк субъектiлерiне немесе коммерциялық емес ұйымдарға – 200 АЕК немесе 738 400 теңге;
орта кәсiпкерлiк субъектiлерiне – 300 АЕК немесе 1 107 600 теңге;
ірi кәсiпкерлiк субъектiлерiне – 600 АЕК немесе 2 215 200 теңге.
