Қазіргі таңда әлеуметтік желілер арқылы елді араңдатып, мән-жайдың байыбына бармастан жалған ақпарат таратушылардың қатары көбейген. Әрине, бұл жағдайды қатаң бақылауда ұстау маңызды. Тіпті, қалжыңдаймын деп мәселені ушықтырып жатқандар бар. Енді ойнаймын деп жалған ақпарат таратқандар қатаң жаза арқалауы мүмкін, nege.kz порталына сілтеме жасаған 4tagan.kz ақпарарттық агенттігі.
Мұндай шешімнің себебі де жоқ емес. 2022 жылы террорлық сипаттағы жалған хабарламаларды тарататындар көбейген. Мұндай қаскүнемдіктің араны тыйылмай тұр. Бір жылдың ішінде Қылмыстық кодекстің 273-бабы бойынша 181 қылмыстық іс қозғалған. 20 қылмыстық іс сотқа жіберілген. Қылмыстық әрекетке барғандардың көпшілігі телефон арқылы жалған хабарламалар жіберіп отырған. Қазіргі таңда осындай мәселелердің түйінін шешіп, анонимді түрде хабарласатындардың жеке басын анықтау үшін ауқымды жұмыстар жоспарланып отыр. Мысалы, шет елдермен жедел әрекет ету мақсатында Будапешт конвенциясына («Компьютерлік қылмыстар туралы») қосылу жұмыстары жүргізіле бастады. Енді жалған ақпарат таратудың жазасы қатаңдап, қалжыңдағысы келгендер жеті жылға бас бостандығынан айырылады.
Терроризм актісі туралы көрінеу жалған хабарлама тарату қылмысқа жатады. Оған әзіл ретінде қарап, бос уақытыңды өткізетін ермек ретінде санаудың қажеті жоқ. Оған арнайы жаза тағайындалатынын жоғарыда айтып өттік. Ол жазадан ешкім де жалтара алмайды. Терроризм актісі туралы жалған ақапарат таратқандарды «ауыр» санатқа жатқызу мәселесі пысықталса, бұрынғыдай 5 жылға емес, 7 жылға бас бостандығынан айырылады.
«Сондай-ақ, Бас прокуратура мүдделі мемлекеттік органдармен бірлесіп, жалған терроризм үшін қылмыстық жауапкершілікті күшейту және құқық бұзушылықтың бұл түрін «ауыр» санатқа жатқызу (7 жылға дейін бас бостандығынан айыру) мәселесін пысықтауда», — делінген Қазақстан Республикасы Бас прокуратурасы таратқан мәліметте.
