Интернеттің дамуы білім алу, денсаулық сақтау, техника, қоғамдағы қарым-қатынас, адам баласының өмір сүру үрдісін күрт өзгертіп, чаттар, форумдар, түрлі сайттар адам өмірін тұтас қамтитын болды.
Дәл бүгін де ала-құла діни ақпараттар әрқайсымыздың интернеттегі жеке адрестерімізге сілтеме немесе спам түрінде де келіп жатады. Ислам, пайғамбар, ақырет… деген жалпы діни ұғымдарды желеулеткен түсініксіз ақпараттардың астарынан қандай «құбыжық» шыға келетінін де әлі толық сезініп болғанымыз жоқ. Мысалы, діни сарындағы мынандай ақпараттарды жиі кездестіруге болады.
Ұялы телефоныма келген мына бір хатта адамды іштей күйзеліске түсіретін оқиғаны баяндап келіп: «бұл ақпаратты 20 адамға таратсаң, 5 минуттан кейін өміріңде өзгеріс болады. Құранды теріске шығаруға болмайды», – деп қорытындылаған.
Тағы бір хатта Құранды қорлаған қыздың тышқанға айналып кеткендігі туралы айтылған. Тіпті, жан түршігерлік суреті де көрсетілген. Бірақ, суреттер мен видео роликтерді жариялауды жөн санамадық. Пайғамбарымыз (Алланың Оған игілігі мен сәлемі болсын) Ислам дінін осылай жеткізген бе еді? Мұндай мәліметтер дағуат (дін жеткізу) ғылымының шарттарына сәйкес келе ме?
Ал, тағы бір видео роликте қабір азабын тартқан жас жігіттің күнәға толы өмірі туралы баяндалған. Ислам дінінде қабір азабының болатындығы туралы айтылған және еш күмәнсіз сенеміз. Мүнкәр-Нәкір періштелерінің сұрақ сұрайтыны да ақиқат. Өйткені, ол нәрселер қасиетті Құран мен хадистерде айтылған.
«2000 жылдары интернет қолданушылары бар болғаны 4% еді. Ал қазір 65%-ға жетті. Бұл шынымен де ақпараттық төңкеріс», – Эндрю Кохут, PewResearchGroup, PBS (31.12.2009).
«Әлемдегі әрбір 13 адамның Facebook әлеуметтік желісінде аккаунты бар, американдықтардың 48%-ы ақпаратты осы желіден алады және 20 минут сайын желіге 2,7 млн сурет салынады», – France24 (26.02.2011).
«Жасөспірімнің 95%-ы интернет тұтынады және 78%-ның жеке ұялы телефоны бар…», – Pew Internet Survey: Teens and Technology, 2013.
Ә.БЕКТҰР, ҚМДБ баспасөз бөлімінің бас маманы, дінтанушы
