Өткен жылдың өзінде 83 адам жалған ақпараттың кесірінен құрбан болған. Бұл ресми дерек. Ал анықталмай, қалғаны қаншама?! Өкінішке қарай 83 адамның артында тұрған осыншама отбасының қара жамылып қалғаны еске түссе, жүрегің қақ айырылғандай күй кешесің.
Бұл күнде аңқау елге арамзалық ету екінің бірінің қолынан келеді. Ине көзінен өтетін алаяқтар смартфонға сүңгіп, интернетте өріп жүр. Бірі жұмыс тауып берем десе, екіншісі оңай ақшаға қарық боласың деп алдайды. Расында жалған ақпарат адамдарды адастырып, табысынан айырып, жолдан жаңылдырғанын көріп, естіп жүрміз. Бір жағы, жалған ақпараттың артында алаяқтық пиғылдар жасырынып тұрады. Әсіресе, әлеуметтік желі қолданушылары fake-тің ілмегіне ілінеді.
«Алтын көрсе періште жолдан таяды» дегендей осыған сенетіндер, батпан құйрыққа елітетіндер шаш-етектен. Әрине көкейдегісі аяқ астынан байып кету.
Адамнан айла артылған ба, бір кездері жалпақ жұрт жарғанаттың ұясын іздеп шарқ ұрғанын білеміз. Мұнымен қатар гір тасын жиып, «Зилл» атты тоңазытқыш іздеп, тентіреп кеткендер де бар.
Жарқанаттың ұясы демекші, кейін биолог ғалымдар бұл мақұлық ұя салмайтынын, оның кәдімгі тышқан екенін айтып, сенгіштердің ентігіп әрең басты.
Осыған байланысты сол тұста ҚР Білім және ғылым министрлігі зоология институтының ғылыми қызметкері Марина Чирикова:
– Жарқанаттың ұясын көрсетсе ол кісіні бірден Нобель сыйлығына ұсынар едік. Себебі, жарқанат ұя салмайды. Ол кәдімгі тышқан секілді ағаштың қуысына, шатыр астына, үңгірлерде өмір сүреді. Ол баласын кәдімгі тышқан секілді тірі туады. Төлі анасына жармасып алады. Бір айдан соң, өзі де ұшады. Түрлі видеодағы кокон бұл тропикалық араның ұясы. Ал енді бір видеодағы кокондарды аферистер лай-саздан жасап алған. Алданып қалмаңыздар. Жарқанатта ұя болмайды, – деген.
