Түркістан облысында кәсіп ашуға ниетті азаматтарға мемлекет тарапынан үлкен қолдау көрсетіліп жатыр. Бүгінде грант алып, кәсіп ашқандар саны күн сайын артып келеді. Соның бірі Кентау қаласына қарасты Қарнақ ауылының тұрғыны Муаттар Азизова «Ауыл аманаты» бағдарламасы аясында 2,5%-дық несие алып, кондитерлік цех ашқан. Кәсіпкер 7 млн. 700 мың теңге көлемінде несие алып, кондитерлік өнімдерді пісіруге арналған құрал-жабдықтарын сатып алған.
Бұл салада келе жатқанына 10 жылдан асқан. Оның айтуынша, кондитер цехын іске қосқалы сұраныс артқан. Алдағы уақытта отбасылық кәсібіне наубайхана жұмысын да іске қосуды жоспарлап отыр.
Қазір күніне 15 келідей бәліш түрлерін, 150-200 самса, тапсырысқа орай түрлі тәтті тоқаштар пісіреді. Жасаған өнімдері ауыл тұрғындарынан-ақ артылмайды. Негізгі мамандығы журналист Муаттар Азизова бұл салада 15 жылдай қызмет етіп, кәсіпкерлікке бет бұрған. Отбасында үлгілі келін, 4 қыз, 1 ұл тәрбиелеп отырған көпбалалы ана.
Ал, Сарыағаш ауданына қарасты Құркелес ауылдық округі, Құлтума елді мекенінің тұрғыны Алтынбек Өтешов жартылай шөлді климатта өмір сүретін түйеқұс өсірумен айналысады. Зейнеткер түйеқұстарды 1 жыл бұрын Шымкент қаласындағы «Қарабұлақ» базарынан сатып алған. Бағасы 85 мың теңге тұратын түйеқұстар күніне 15 келіге дейін жем жейді. Қазіргі таңда шаруа 7 бас түйеқұс өсіріп отыр. Алдағы уақытта 200 басқа көбейтуді жоспарлап отыр.
Айта кетейік, түйеқұстың пайдасы орасан. Оның терісі, тұмсығы әсіресе еті нарықта үлкен сұранысқа ие. Өйткені, етінің құрамында май мен холостерин аз. Бойы 2 метрге жететін түйеқұс 100-150 келіге дейін ет береді. Бұдан бөлек, бір маусымда салмағы 3-3,5 келілік 120 дана жұмыртқа береді. Түйеқұстар табиғи жем шөбі, күтімі жақсы болса 80-100 жыл өмір сүреді.
Сондай-ақ, Кентау қаласының тұрғыны Әйгерім Амирова мемлекеттік бағдарлама арқылы кәсібін ашып отыр. Ол ұлттық нақыштағы киім, көрпе-жастық тігіп, құрақ құрауды қолға алған. Кәсібін дамыту мақсатында 2023 жылы мемлекеттен қайтарымсыз 1 млн 380 мың теңге көлемінде грант алып, қажетті құрал-саймандар сатып алған.
Ол құрақ құрауды бала кезінде анасынан үйренген. Бірнеше жыл бұрын тігін шеберлік сабағына қатысып, заманауи үлгіде шапан тігуді үйренген. Бүгінде 350 түрлі үлгіде құрақ көрпелер тігіп, Кентау қаласы бойынша тапсырыстар қабылдап жатыр.
