Түркістан қаласындағы «Қамқорлық» жанұя орталығы құрылғалы бері жүйелі жұмыс атқарып келеді. Өткен жылы 2 568 тұрғынға көмек көрсеткен. Сондай-ақ, әлеуметтік әлсіз отбасы мүшелерін өзін-өзі қаржылай қамтуы үшін мекемеде 10 кәсіп түрінен тегін курс оқытылады. Төрт кезең арқылы («QADAM» — білім беру жобасы, «KENSE»-әлеуметтік қызмет көрсету орталығы, «NӘTIJE»-әлеуметтік жоба, «QOLDAU») жүзеге асатын кәсіптік курсты 2023 жылы 275 азамат оқып, бүгінде жұмыс тапқан. Ал кәсібін ашуға ниетті 11 көпбалалы ана орталық сүйемелдеуі арқылы мемлекеттік қайтарымсыз грант иегері атанған.
Тегін курстар шаштараз, тігін ісі, қолөнер бұйымдарын жасау ісі, аспазшы, тәрбиеші, кондитер, балалар массажы ісі мен эстет косметология, маникюр, педикюр мамандықтары бойынша оқытылуда. Одан бөлек, орталыққа келушілер тегін психолог, заңгер кеңесі және цифрлық қызмет түрлеріне жүгіне алады.
Сондай-ақ, орталық жалғызбасты аналар мен көпбалалы аналарға қолдау көрсету мақсатында еліміздің түрлі саласындағы танымал адамдармен кездесулер, тренинг сағаттарын ұйымдастырады. Өткен жылы орталық қызметімен танымал журналист Ләйлә Сұлтанқызы, ҚР Парламенті мәжілісінің депутаты Гаухар Танашева, ҚР мәжілісінің депутаты, заңгер Абзал Құспан, ҚР Бала құқықтары жөніндегі уәкіл Динара Болатқызы, Гендерлік мәселелер бойынша ЮНФПА ұлттық консультанты Сағадат Ташболатқызы сынды азаматтардың қатысуымен шеберлік сағаттары өтті. Биылғы жылға орталық көпбалалы отбасы, әлеуметтік әлсіз топ санатындағы отбасы балаларына тегін ағылшын, орыс тілі курстарын оқыта бастады.
