ҚР Парламенті мәжілісінің депутаты Темір Қырықбаев Мақтаарал ауданына жұмыс сапарымен келіп, аудан тұрғындарына қоғамдық қабылдау өткізді.
«Amanat» партиясының аудандық филиалының қоғамдық қабылдау бөлмесінде өткен іс-шараға аудан әкімінің орынбасары Бейсенбай Төребеков, аудандық мәслихаттың депутаттары, тиісті сала басшылары қатысты.
Қабылдауға келген азаматтар мектептерді жылыту, ПУИД-2 бағдарламасының құрылысы, тоғай алқаптарын мемлекет меншігіне қайтару, дренаждарды іске қосу, учаскелік жер телімі, медициналық нысандардың ахуалы, әлеуметтік сала, ауыз су бойынша мәселелер көтеріп, сұрақтар қойды.
Өз кезегінде халық қалаулысы мәселе көрген әрбір тұрғынды мұқият тыңдап, қойылған сұрақтар бойынша тиісті сала басшыларының жауабын қарады. Жергілікті жерде шешілетін мәселелерді дереу қолға алуды тапсырып, республикалық деңгейде шешілетін мәселелерді Парламент төрінде көтеретінін жеткізді.
Қоғамдық қабылдаудан соң депутат жаңадан пайдалануға берілген аудандық спорт сарайының және қаржының бөлінбеуіне байланысты құрылысы тоқтап тұрған орталық саябақтың жағдайымен танысты.
Сонымен бірге, ҚР Парламенті Сенатының депутаттары Ә.Ә.Бектаев, М.Б.Қадырбек, А.Г.Сатыбалдиевтар Мақтаарал ауданына жұмыс сапарымен келді.
Ең алдымен депутаттар «Мырзакент» мақта зауытының жұмысымен танысып, зауыт жұмысшыларымен кездесу өткізді.
Жалпы құны 1 миллиард теңгені құрайтын өндіріс ошағының Шардара, Жетісай, Мақтаарал аудандарындағы мақта қабылдау пункттерінде мыңға жуық адам еңбек етеді. АҚШ-тың соңғы үлгідегі жаңа технологиясымен жабдықталған зауыттың өндірістік қуаттылығы жылына 60 мың тоннаны құрайды. Бірақ шикізаттың жетіспеушілігіне байланысты биыл 40 мың тонна мақта қабылдаған. Соған қарамастан басқа зауыттармен салыстырғанда еңбек өнімділігі 30 пайызға жоғары. Оған сандық технологияның арқасында қол жеткізіп отыр.
Зауыт жұмысшыларымен кездесу барысында өндіріс орнындағы еңбек қауіпсіздігі, жұмысшылардың әлеуметтік жағдайы мәселелері сөз болды.
Мұнан соң халық қалаулылары «Жастар орталығы» КММ-нің ғимаратында аудан тұрғындарымен кездесті.
Кездесуге аудан әкімі Бақыт Асанов, облыстық, аудандық мәслихат депутаттары, ардагерлер, зиялы қауым өкілдері, кәсіпкерлер, жастар және қоғамдық бірлестіктердің өкілдері қатысты.
Кездесу барысында аудан көлемінде шешімін таппай жатқан түрлі әлеуметтік-экономикалық мәселелер көтерілді. Өз кезегінде сенаторлар аталған мәселелерді жоғары жақта көтеріп, шешімін табуға атсалысатындарын жеткізді.
