Келес ауданында ауыз су кестемен берілетін елді мекендердің мәселесі талқыланды. Түркістан облысы әкімінің бірінші орынбасары Зұлпыхар Жолдасов ауданға арнайы келіп, Алпамыс батыр ауылдық округінің Ақжол және Қауыншы ауылдарын ауыз сумен қамту мақсатында Келес өзенінің бойынан бұрғыланып жатқан су ұңғымасының құрылысымен танысты. Жобаны сапалы әрі уақытылы тапсыру жөнінде тапсырмалар жүктеді. Жобаның іске асуын тікелей өз қадағалауына алатынын айтып, жұмысты ширатуды тапсырды.
Облыс әкімінің бірінші орынбасары Зұлпыхар Сансызбайұлы Келес ауданына жасаған жұмыс сапары Біртілек ауылдық округінің Игілік елді мекенінде жалғасып, кестемен берілетін ауыз су нысандарының мәселелерін көзбен көріп, шешу жолы талқыланды. Тиісті сала басшыларына нақты тапсырмаларды жүктеп, арнайы ісшара жоспарын бекітуді тапсырды.
Іссапар соңында Түркістан облысы әкімінің орынбасары Зұлпыхар Жолдасовтың төрағалығымен Келес ауданы әкімі аппаратында Келес, Сарыағаш, Мақтаарал, Жетісай, Шардара және Қазығұрт аудандары әкімдерінің қатысуымен жиын өтті. Жиынға ауыз су саласына қатысты мекеме басшылары мен мердігер мекеме өкілдері де қатысты. Онда нысандарды аралау барысында көрілген кемшіліктерді жою жөнінде сөз қозғалып, ұсыныс, пікірлері тыңдалды.
Соынмен бірге, Келес ауданы әкімінің орынбасары Сүлеймен Жылқыбаев пен аудандық төтенше жағдайлар бөлімінің бастығы, азаматтық қорғау подполковнигі Хайрулла Кеңесов аудандағы су тасқыны ықтималдылығы бар елді мекендерде болып, тасқынның алдын алу жұмыстарын пысықтады.
— Ауданымыздан ұзындығы 100 шақырымға жуық Келес өзені кесіп өтеді. Қыстың соңғы айы мен көктемнің басында су тасу қауіпі артары мәлім. Сондықтан дайындықты осы бастан пысықтаған жөн. Алдағы уақытта ауыл әкімдері мен аудандық төтенше жағдайлар бөлімі тұрақты байланыста болып, әрбір сәтті қадағалауда ұстау қажет, — деді Сүлеймен Нұрланұлы.
Айта кетейік, аудан әкімінің орынбасары мен Төтенше жағдайлар бөлімінің бастығы көктемгі су тасқынының алдын алу мақсатында Ошақты ауылдық округіндегі Қоңыртобе елді мекені және Ақтөбе ауыл округіндегі Жаңадәуір, Жуантөбе, Ғ. Мұратбаев елді мекендерінен ағып өтетін Келес өзенін, кашырткылар, арыктар мен каналдарды тазалау, бөгеттерді нығайту бойынша «Тұран су» мекемесінің жұмысын бақылады. Сондай-ақ ауылдық округі әкімдеріне су тасқынына қарсы қосымша тапсырмалар берілді.
