Келес ауданының әкімі Жәнібек Ағыбаев Ұшқын ауылдық округін дамыту бойынша мәжіліс өткізді. Жиын барысында шекаралық округтің экономикасын көтеру жолдары талқыланды. Аудан басшысы ауыл әкімі мен орынбасары, жауапты сала мамандарына және дербес бөлім басшыларына өз салалары бойынша жұмысты жүйелеуді тапсырды. Алдымен ел мүддесі орындалуы тиіс екенін жеткізді.
— Берілген тапсырмалардың орындалуында кемшіліктер бар. Салалар бойынша аудан әкімінің орынбасарлары және аудан әкімі аппараты бақылауға ала отырып, қажетті жұмыстарды атқару қажет. Ауылдың жағдайын жақсарту, халықтың жақсы өмір сүруі үшін бағытталған жұмыстар бойынша да кемшіліктер жоқ емес. Ауыл шаруашылығында – егін шаруашылығын дамыту, оның ішінде, жылыжай салу, тамшылатып суғару әдісін енгізу, ағын суды тиімді пайдаланған жөн. Сонымен қатар кезектегі азаматтарға жер телімін үлестіруде заңдылықты бақылауға алу керек. Жалпы берілген тапсырмаларды орындауда ауыл әкіміне ғана бар жүкті артпай, ауыл әкімі аппаратының қызметкерлері де жұмыла ел игілігі жолында қызмет атқаруы қажет. Әрбір мемлекеттік қызметшілердің функционалдық міндеттеріне зерделеу жүргізіп, тиімді шешім қабылдауды тапсырамын, — деді Жәнібек Ағыбаев.
Жиында ауыл әкімі Олжас Саттаров барлық сала бойынша атқарылған жұмыстарға тоқталды. Ел әлеуетін көтеру бағытында жоспарлар істеліп, жобалар қолға алынғанын мәлімдеді. Келес ауданы әкімі аппаратының ұйымдастыру бөлімшесінің бас инспекторы Асылхан Шалқаров өз баяндамасында Ұшқын ауылдық округіне істелген зерделеу жұмыстарының нәтижесін атап өтті. Көңіл көншітпейтін тұстарын ашып айтып, әрбір сала бойынша көрсеткіштерді жеке-жеке сараптады. Жиында ауылдық округі әкіміне инфрақұрылымды жақсарту, жер саласындағы түйткілдерді шешу, санитарлық тазалық пен көгалдандыру жұмыстарын жандандыру, кәсіпорындар, жұмыс орындарын ашу, ауылдың өзіндік кірісін көбейту жөнінде тапсырмалар жүктелді.
