Төрт жүзге жуық түтіні бар Түлкібас ауданы, Састөбе кентіне қарасты Ынтымақ ауылы күн санап ажарланып келеді. Олай дейтініміз, соңғы жылдары ауыл ішіндегі тозығы жеткен көшелер рет-ретімен жөндеуден өтіп, жарық шамдар орнатылмаған көшелерге түнгі жарық шамдар орнатылып, соғыс ардагерлеріне арналған обелиск жөндеуден өтті.
Елді мекендегі өзекті мәселенің бірі болып келген 320 орындық А.Оразбаева мектебі толық жөндеуден өтіп, ел иігілігіне пайдалануға берілді. Нысанның шатырынан бастап, жылу, электр жүйесі жаңартылып, есік, терезелері және едені ауысқан. Ішкі және сырты әрлеу жұмыстары жүргізіліп, ауласы абаттандырылды.
Аталған елді мекенге аудан әкімі Нұржан Ізтілеуов арнайы табан тіреп, мектептің сапасын бақылады. Жергілікті тұрғындармен кездесіп, аймақтағы өзекті мәселелерге құлақ асты.
Атап айтсақ, ынтымақтықтардың көп жылдан бері көкейінде жүрген ауылдық клуб мәселесі сөз болды.
Бүгінде апатты жағдайда тұрған клубтың орнына жаңадан ғимарат соғу үшін облыстық тиісті басқармаға аудан тарапынан қажетті құжаттар толық дайындалып, өткізілген. Алайда қаржы тапшылығына және тиісті басқармадан қолдау таппауына байланысты нысан құрылысы кейінге шегеріліп келген.
Аудан басшысы бұл мәселені Заң аясында шешу мақсатында жауапты мемлекеттік органдармен тиісті жұмыстар атқарылып жатқанын атап өтті.
Сонымен қатар, кездесуде жеке меншікке өтіп кеткен Жиынбай каналын қайтару мен ауыл кітапханасына ғимарат қарастыру мәселесі талқыланды. Нұржан Жақсылықұлы бұл мәселелер бойынша хабардар екенін тілге тиек етіп, қордаланған мәселелердің түйінін шешу мақсатында тиісті жұмыстар атқарылып жатқандығын жеткізді.
