Бүгінде елімізде іске асып жатқан бағдарламалардың басым бөлігі шағын және орта кәсіпкерлікті дамытып, халықтың әл-ауқатын арттыруға бағытталуда. Мемлекет басшысы Қасым-Жомарт Тоқаев Қазақстан халқына Жолдауында халықтың әл-ауқатын арттыру басты мақсат екендігін атап өтті.
Осы мақсатта, Түркістан облысының әкімі Дархан Сатыбалды аудан, қала әкімдеріне инвестиция тарту арқылы жаңа жұмыс орындарын құру бағытында нақты тапсырмалар жүктеді. Берілген тапсырма аясында Созақ ауданының әкімі Мұхит Тұрысбеков бастаған делегация Қытай Халық Республикасында арнайы іссапармен жүр. Сапардың негізгі мақсаты — экономикалық даму бойынша халықаралық тәжірибе жинақтап, жаңа технологияларды игеру.
Делегация құрамында аудандық мәслихат төрағасы Ордабек Жәмиев және бірқатар бөлім басшылары мен аудан кәсіпкерлері бар.
Сапар аясында аудан делегациясы Хэнан провинциясындағы China Gezhouba Group Overseas Company Co., Ltd деп аталатын қабырғаларды оқшаулауға арналған көбік шығаратын зауытқа барды. Зауыттың тарихымен және онда өндіріліп жатқан өнімнің жетістіктерімен жан-жақты танысты. Бүгінгі нарықта жылу оқшаулау үшін аса сұранысқа ие материалды дайындайтын зауыт қызметкерлерімен тілдесіп, өнім көлемі мен тиімділігін назарға алды.
Айта кеткен жөн, делегациясының іссапары 10 желтоқсанға дейін жалғасады. Аудан басшысы ертеңгі жұмыс күнінде Чженчжоу қаласындағы бірқатар зауыт-фабрикаларды аралап, бизнес өкілдерімен кездесуді жоспарлауда. Сондай-ақ арнайы барған аудан кәсіпкерлері алдағы уақытта аудан аумағынан ашуға мүмкіндік беретін фабрикалардың құрылымымен танысып, тәжірибе алмасатын болады.
Бүгінде Чжэнчжоу халқы 10 120 000 тұрғынды құрайды. Қала Қытайдың ұлттық көлік желісінің ірі торабы болып табылады. Теміржолдар Чжэнчжоуды Еуропамен және халықаралық әуежаймен байланыстырады.
