Келес ауданы, Ақтөбе ауылдық округі аумағындағы жалпы көлемі 2 гектарды құрайтын қоқыс полигоны қоршалып, түнгі жарық шамдары орнатылды. Сондай-ақ арнайы күзет қойылды. Аталған жұмыстарды Келес ауданы әкімдігінің «Келес қызмет» мекемесі тарапы іске асырды. Сонымен қатар аудан аумағындағы белгіленген қоқыс алаңдарын арнайы стандартқа сәйкестендіру бойынша қажетті шаралар атқарылуда. Бұл туралы Келес қызмет мекемесінің директоры Байтуған Керинбаев мәлімдеді.
— Бүгінгі таңда аудан әкімінің тапсырмасына сәйкес өңірдегі 16 полигонды ретке келтіру бойынша жұмыс атқарылуда. Қазірде 2 техника мен 10 жұмысшы қоқыс алаңдарында шашылған қалдықтарды белгіленген жерге жеткізіп, ретке келтіруде. Жоғарыда атаған он алты полигонның бесеуінің арнайы қоршауы болса, алдағы уақытта қоқыс тасталмаған полигондарды экология мамандарының келісімімен жабу жұмыстарын жүргіземіз. Сонымен қатар, Үшқын ауылдық округінің орталығындағы қоқыс полигонын «Келес қызмет» мекемесінің теңгеріміне алу жұмыстары атқарылуда. Құжаттандыру жұмыстары аяқталған соң аталған қоқыс полигоны заң талаптарына сай арнайы қоршау қойылатын болады, — деді Байтуған Керинбаев.
Өз кезегінде Келес ауданының тазалығана жауапты мекеменің директоры тұрғындардан мал өлекселерін арнайы орындарға жеткізіп тастауын, қатты тұрмыстық заттарды қоқыс полигондарының ішіне кіргізіп тастауды қолға алуды сұранады.
Айта кетейік, бүгінде жергілікті әкімдік бекіткен грфикке сәйкес Абай ауылы мен Алпамыс батыр ауылдық округінде тұрмыстық қатты қалдықтарды алып кететін мекеме өз жұмысын жүргізуде. Алдағы уақытта аудандағы қалған ауылдық округтерде де жеке секторлардан шыққан қоқыстардың тасымалы ұйымдастырылады. Қазірше бұл жұмысты «Келес қызмет» мекемесі атқаруда.
