Жуырда Қазақстан Республикасы Ұлттық музейінде Қазақстан музей қызметкерлерінің бірінші конгресі өтті.
«Өзбекәлі Жәнібеков мұрасы және музей ісі» атты халықаралық ғылыми-тәжірибелік конференциядан бастау алған айтулы шараның пленарлық мәжілісінде ұлт мәдениетін ұлықтаған дара тұлғаның өмірі мен өнегелі жолдары туралы құнды баяндамалар ұсынылды.
Аталған шараға еліміздің әр өңірінен қатысқан музей саласының шынайы майталмандары, тың деректер мен салмақты ойларын ортаға салды.
Иә, елімізде тұңғыш рет өткізілген ауқымды шарада алты секция жұмыс істеді. Бірінші секцияда «Ө.Жәнібеков және Қазақстанның тарихи-мәдени мұрасы»; екінші секцияда «Қазақстанның музей ісі тарихы мен теориясына қатысты мәселелер»; үшінші секцияда «Қор жинақтау, сақтау, насихаттаудағы тәжірибелер мен оның өзекті мәселелері»; төртінші секцияда «Музейдің көрме-экспозияция жұмысы: Заманауи әдістер мен технологиялар»; бесінші секцияда «Музейдің мәдени білім беру беру жұмысындағы инновациялық тәсілдер»; алтыншы секцияда «Музей менеджментіндегі заманауи шешімдер» мәселелері қаралды.
Екінші секция жұмысында «Музей тарихында Өзағаңның есімі ерекше аталады» атты тақырыпта баяндама жасап, Өзағаңның Бәйдібек ауданы өңірінде болғанын, тарихи ескерткіш болып саналатын «Шаян мешіт-медресесінің» ғимаратын сақтап қалудағы еңбегі жайында және ауданға келген сапарлары туралы тың деректерді ұсындым.
Аталған баяндама ҚР Мәдениет және ақпарат минстрлігі, ҚР Ұлттық музейдің ғылыми басылымына (жинағына) енгізілді.
Конгресте Өзағаңның ұлы — Бауыржан, қарындасы мен қыздары және немерелері де сөз сөйлеп, ой-пікірлерін ортаға салды. Сондай-ақ, конгресте қоғам қайраткері Дархан Мыңбаймен сұхбаттасудың да сәті түскенін айта кеткім келеді.
Жалпы алғанда музей қызметкерлерінің алғашқы конгресі Президентіміз Қасым-Жомарт Тоқаевтың «Әділетті Қазақстанның экономикалық бағдары» атты Жолдауында атап көрсеткеніндей «Біз мәдениетті, білімді, ғылымды дамыту арқылы қазіргі ашық әлемнің бір бөлшегі болуға ұмтылуымыз керек» деген бағдарын іске асыру мен еліміздің мәдени құндылықтарына деген қамқорлықтың жылдан-жылға артып келе жатқанын көрсетті.
Б.БАЙСАРЫ,
Бәдібек ауданы сәулет-көркем музейінің директоры.
