Райымбек Сейтметов атындағы Түркістан сазды-драма театрында драматург, Халықаралық «Алаш» әдеби сыйлығының лауреаты Лидия Егембердиеваның «Қалталы күйеу, қайдасың?!» комедиясының премьерасы өтіп, көрерменге жол тартты.
Автормен бірге тамашалаған Түркістан облысы мәдениет және туризм басқармасының бөлім басшысы Мұқағали Кенжетайұлы қойылымнан соң театр ұжымын тұсаукесермен құттықтап, ұжымға шығармашылық табыс тіледі. Сондай-ақ қонақтарға құрмет көрсетті. Сонымен қатар Түркістан қалалық мәдениет үйінің директоры Лиза Шамет сөз сөйлеп, сый-сияпат жасады.
Комедия ауылдық жердегі қарапайым үш қыздың арманынан бастау алады. Қыздар қауымы бірінші кезекте – ақылды, бай, көрікті жігітке тұрмысқа шығуды армандайды. Бұл – өмір шындығы. Қиялдарына ерік беріп, қомақты қаржыны қалтаға басып шипажайға келген үш ару қалталы жігіттерді құрығына түсіру жоспарын бастап кетеді. Алайда, адам пешенеге жазғаннан асып кетпейді деген сөз жайдан жай айтылмаса керекті. Қалалық бай азаматтарды армандап, сезім сергелдеңіне түсіп, махаббат машақатымен алысқан қыздардың оқиғасы қойылымды қыздыра түсті.
Қала мен ауыл арасындағы байланысты, шынайы махаббатты, адамдардың мінез-құлқын бүкпесіз суреттейтін қойылым екі күн бойы көрерменнің жүрегінен орын алып, көтеріңкі көңіл-күй сыйлады. Қоюшы режиссері – Айдар Наурызбаев, қоюшы суретшісі– Қанат Шериев. Режиссердің ассистенті – Шәкен Амантуров, композиторы – Қанат Жұмабаев
