Түркістан облысы мәдениет және туризм басқармасына қарасты «Оңтүстікфильм» мекемесінің ұйымдастыруымен балаларға арналған Шымкент қаласында іс-шара өтті.
Биыл Түркістанның облыс орталығы болғанына 5 жыл толуына орай «Ұлттық кино» жобасы аясында өткізілген жиынға №2 «Оқушылар сарайы» МКҚК-нан жалпы саны 60-тан астам жасөспірім қатысып, «Түркістан» анимациялық фильмін тамашалады. Кинокөрсетіліммен қатар, аталған орталықта кеш қонағы, өңірімізде түсірілген көптеген көркем және анимациялық фильмнің режиссері, «Құрмет» орденінің иегері, ҚР Мәдениет қайраткері Батырхан Дәуренбековпен кездесіп, көлемді сұхбат өткізді. Жас буын өкілдері жан-жақты сұрағына жауап алып, мазмұнды тағылымы мол әңгімеге қанық болды.
Шара соңында сөз алған «Оңтүстікфильм» мекемесінің директоры Райхан Нарикова аталған жобаның мақсатына тоқталды.
– Бүгінгі шараның негізгі мақсаты – облыстағы қасиетті мекендер мен киелі жерлерді айрықша көрсетіп, ұлттық құндылықтарымыз бен салт-дәстүрімізді дәріптеу. Тәрбиелік мәні зор туындыларды өскелең жас ұрпақтың бойына сіңіру баршамыздың парызымыз. Осыны негізге ала отырып, биылғы мекеме жоспарына сәйкес, жасөспірімдерді Отансүйгіштікке жетелейтін бағыттағы анимациялық фильмдер кинокөрсетілімін жыл басынан бері Түркістан облысының аудандары мен көршілес жатқан Қызылорда қаласында өткіздік. Бұл бағыт бойынша алдағы уақытта әлі де кеңінен насихаттау жұмысы жүргізіледі деп сенім білдіремін. Бұл тұрғысынан өз үлесін қосып келе жатқан әріптестерімізге алғыс білдіремін. Кинокөрсетілім бойынша іс-шараларымыз қорытындыланып келеді. Жыл аяғына дейін Түркістан қаласында өткізілетін жобаларымыз өз мәресіне жетеді, – деді Райхан Дәрменқызы.
Шара барысында аталған орталықтағы дәріс алушы талантты қылқалам шеберлері жергілікті «САҚ» киностудиясы таспалаған анимациялық фильмдердің бірқатар кейіпкерлері бейнеленген бұрыш көрмесін арнайы сый ретінде дайындаған. Кеш кейіпкері – режиссер Батырхан Дәуренбеков сол қабырға көрмесіне өз қолтаңбасын қалдырды.
Айта кетейік, «Оңтүстікфильм» мекемесі осыған дейін Қызылорда облысында, өңірімізде Мақтаарал, Қазығұрт, Төлеби, Түлкібас, Сайрам ауданы мен Жетісай, Арыс және Кентау қаласында балалар кинокөрсетілімін өткізіп, ұсынылған туындылар көпшілік көңілінен шыға білді.
