Мемлекет басшысы Қасым-Жомарт Тоқаев Қазақстан халқына арнаған биылғы Жолдауында да көптеген өзекті проблемалар мен күрмеуі көп мәселелерге тоқталды. Маған айрықша ұнағаны, орта кәсіпкерлікті дамыту мәселесі жөнінде айтқаны. Рас, кәсіпкерлікті қолдау туралы билік тарапынан жиі сөз болғанымен, нақты көрсетіліп жатқан көмек шамалы. Сондықтан шағын және орта бизнестің даму қарқыны әлі де төмен. Бұл үдеріс неге қанатын жая алмай отыр? Өйткені, олар түрлі әкімшілік кедергілерден аяқ алып жүре алмайды. Сол себепті тұсаулы аттай кібіртіктей береді. Еркін қадам жасауға мүмкіндік бермейді. Байлап-матап тастаған секілді. Мұны бизнесте жүрген азаматтардың көпшілігі біледі деген ойдамын. Ел Президентінің: «Жаңа экономикалық үлгіге көшу үшін оны «қолмен көтеруге» тура келеді. Ең алдымен, орта бизнестің дамуын тежеп тұрған «бюрократиялық барьерлерді» жою қажет. Орта кәсіпкерліктің басым бөлігі әбден дамыған кезде бөлшектеніп кетеді. Өйткені, кейбіреулерге шағын бизнес деңгейінде қалғаны өте «қолайлы» көрінеді» деген сөздері көкейге қонады және ол ақиқат.
Қасым-Жомарт Кемелұлы кемшіліктерді атап қана қоймай, мұндай тығырықтан шығу жолдарын да атап көрсетіп, Үкіметке нақты тапсырмалар берді. Шағын бизнесмендердің өзара бірігіп, ірі кәсіп иелері болуға жетелейтін мотивация қажет. Оларды осы мақсатқа ынталандыру үшін қазіргі қолданыстағы заңға өзгерістер керек. Қарап отырсаңыз, ел нарығында белсенді жұмыс істеп, көл-көсір табыс тауып жатқан орта кәсіпорындар жетіп артылады. Соларға төменгі пайызбен кредит беріп, нақты қолдау көрсетіп жатса, нұр үстіне нұр! Осындай табысты кәсіпорындардың әрқайсысына қатысты нақты жоспар әзірлеу қажет.
Нақты қолдаулар арқылы олардың өндіріс қабілетін арттырып, өнім көлемін екі-үш есе көбейту керек. Жалпы, ҚР Президентінің: «Бизнестің жол картасы» және «Қарапайым заттар экономикасы» бағдарламаларын біріктірген жөн. Кәсіпкерлерді қудалауды тоқтату керек. Олар ішкі экономикамыздың өрлеуіне өз үлестерін қосады» деген уәждерімен толықтай келісемін. Бұдан басқа, салық саласындағы есептерді 30 пайызға төмендету жөнінде Үкіметке тапсырма берді.
Демек, биылғы Жолдаудың шарапатын кәсіпкерлер көреді деген нық сенімдемін.
Н.ҚОЗЫБАҚОВ,
Түркістан облыстық мәслихатының депутаты.
