Шәмші Қалдаяқов атындағы Түркістан облыстық филармониясы облыс әкімі Дархан Сатыбалдының бастамасымен қара шаңырақтың құрылғанына 60 жыл толуына орай облыстың барлық аудан, қаласына «Ауылым – әнім!» атты филармония өнер шеберлерінің жаңа концертін ұйымдастыру өткен айда бастау алған еді. Облыс әкімінің орынбасары Бейсен Тәжібаевтың тапсырма-жоспары негізінде ауыл мәдениетін көтеру, халықтың бос уақытын тиімді ұйымдастыру мақсатында облыстың шалғай ауылдарда өтіп жатқан концерт көптің көңілінен шығып үлгерді. Бұған дейін Түлкібас және Төлеби ауданында өтсе, күні кеше Кентау қаласында өтті. Ал бүгін Бәйдібек ауданында үш бірдей өнер кеші ұйымдастырылып отыр. Осылайша жыл соңына дейін жалғаспақ.
Айта кетейік, аталған ұжым биылдың өзінде үлкен белестерді бағындырып үлгерді. Өнер ұжымы Әзербайжан мемлекетінің Шуша қаласында «Шуша 2023 – түркі әлемінің мәдени астанасы» халықаралық атты салтанаты ашылуында, филармония әншісі Оразәлі Жаңабай және «Qagan» этно-фольклорлық ансамблі 22-24 қыркүйек күндері аралығында Оңтүстік Корея «Вонджу» би аренасында өтетін «Вонджу 2023» би карнавалында өнер көрсетті. Түркістан облысына 5 жыл толуына және Ш.Қалдаяқов атындағы облыстық филармонияға 60 жыл толуына орай Астанадағы «QAZAQSTAN» орталық концерт залында, Тараз қаласында, Шымкент және Түркістан қаласында ҚР Мемлекеттік Әнұранының авторы, ҚР Халық әртісі, Қазақстанның Еңбек Ері, Ұлы композитор Шәмші Қалдаяқовтың әндерінен «Менің Қазақстаным!» атты концерттік бағдарлама өтті. Шымкент қалалық сатира және әзіл-сықақ театрымен бірлескен «Ән мен Әзіл» атты концерті ұйымдастырылды. Филармонияда көп жылдан бері еңбек етіп келе жатқан өнер иелерінің де жеке концерттері назардан тыс қалмаған. Ордабасы және Бәйдібек ауданында Қазақстанның еңбек сіңірген қызметкері композитор, әнші Нышан Төлегеновтың «Бәйдібек баба, Домалақ ана-елінен сәлем сіздерге» атты авторлық ән кеші, Түркістан қаласында ақын-композитор Болат Мұсабековтың ән кеші өткізілді.
