1 қыркүйекте Қазақстан Республикасы Парламенті палаталарының бірлескен отырысында Мемлекет басшысы Қасым-Жомарт Тоқаев Қазақстан халқына кезекті Жолдауын арнады. Елімізде жаңа саяси ахуал орын алып, тың бастамалар қолға алынып жатқан кезеңде халық бұл Жолдауға үлкен үмітпен қарап, ерекше ықыласпен тыңдады.
«Әділетті Қазақстанның экономикалық бағдары» деп аталған Жолдау шын мәнінде мемлекетіміздің одан әрі дамуын айқындап берген маңызды құжат болып саналды. Мемлекет басшысы еліміздің әлеуметтік дамуына, ел тұрғындарының табысы мен жұмыс орындарының сақталуына, халқымыздың денсаулығы мен өмірін сақтау жолындағы жұмыстарға баса назар аудару керектігін қадап айтты.
Сонымен қатар, Қасым-Жомарт Кемелұлы өз Жолдауында қарапайым еңбек адамының, зейнеткерлердің, мемлекеттік қызметкерлер мен білім-ғылым саласы өкілдерінің, қала берді депутаттар мен министрлердің, құқық қорғау органдары мен денсаулық сақтау саласы қызметкерлерінің әрқайсысының міндеттерін, қызметіндегі өзгерістер мен жаңалықтарды рет-ретімен айтып өтті.
Қандай заман болмасын, білім алу ешқашан шетқақпайлық көрген емес. Мына қоғам білімді жастардың қоғамы. Мемлекет басшысының қолдауымен білім саласына ауыз толтырып айтарлықтай қамқорлық жасалынуда. Басқа салаларда да ауқымды шаруалар қолға алынуда.
«Бүгінде менің бастамаларымның басым көпшілігі жүзеге асты. Бірқатар жұмыс жалғасып жатыр. Осы орайда халықтың тұрмыс сапасына тікелей әсер еткен кейбір шараларды атап өткім келеді. Мысалы, 2020 жылдан бері мұғалімдердің жалақысы екі есе өсті. Дәрігерлердің айлығы да айтарлықтай көбейді. Қазір олардың табысы еліміздегі орташа жалақыдан әлдеқайда жоғары. Жұртқа зейнетақы жинағының бір бөлігін пайдалану мүмкіндігі берілді. Миллионға жуық адам осы жобаның игілігін көрді – тұрғын үй мәселесін шешіп, баспаналы болды. «Жайлы мектеп» жобасы аясында 400-ге жуық мектеп салынады. Қазір ауылдық жерде 300-ден астам денсаулық сақтау нысаны салынып жатыр. «Ұлттық қор – балаларға» жобасы қолға алынды. Соның арқасында жаңа жылдан бастап балалардың есепшотына қаражат түсе бастайды. Игерілмей жатқан немесе заңсыз берілген 8 миллион гектар жер мемлекет меншігіне қайтарылды. Мен нақты іске асқан шаралардың бір бөлігін ғана атап өттім. Шын мәнінде, көп жұмыс атқарылды, болашақта да өз жалғасын табады» деді Президент.
Жаңа экономикалық үлгіге өту керектігін айтқан Қасым-Жомарт Кемелұлы еліміздің тұрмыс сапасын жақсарту үшін мықты өнеркәсіптік негіз қалыптастыру және экономикамыз өзімізді толықтай қамтамасыз ете алатын жағдайға жету керектігін тілге тиек етті.
Президент өз Жолдауының түйінін Әділетті Қазақстан және Адал азамат ұғымдарының қадір-қасиетіне арнады. Қазіргідей жаңарған заманда еліміздің әрбір азаматы жоғары білім мен табанды еңбектің нәтижесінде ғана биік белестерден көрінетінін ашық жеткізді. Ел азаматтарын Отанға адал қызмет етуге, абыройлы іс жасауға, терең білім алып, ерінбей еңбек етуге шақырған Президент Жолдауын біздің ардагерлер қауымы да бірауыздан қолдады.
Т.БЕРДІБЕКОВ,
Шардара аудандық ардагерлер кеңесінің төрағасы.
