Түркістан облысы бойынша Экономикалық тергеп-тексеру департаментінің бастамасымен республикамызда алғаш рет кәсіби волонтерлік қызметтің жұмысы басталды.
Қазақстанда еріктілер қозғалысы дамудың жаңа кезеңіне түсті. 2020 жыл елде «Еріктілер жылы» деп жарияланды. Мемлекет басшысы Қасым-Жомарт Тоқаев өз Жолдауында азаматтық қоғамды нығайтуда еріктілердің орны ерекше екенін атап өтті.
Еріктілік – жастардың өз белсенділігін көрсетіп қана қоймай, адамдарға көмек беріп, тәжірибе жинауға, өмірлік маңызды дағдыларды дамытып, әлемді жаңа қырынан көруге мүмкіндік беретін бірден-бір сала.
Еріктілік – жастардың өз белсенділігін көрсетіп қана қоймай, адамдарға көмек беріп, тәжірибе жинауға, өмірлік маңызды дағдыларды дамытып, әлемді жаңа қырынан көруге мүмкіндік беретін бірден-бір сала.
«Ақжайық» музыкалық мектебінде өткен волонтерлік қозғалыстың алғашқы отырысына Түркістан облысы бойынша Экономикалық тергеп-тексеру департаментінің басшысы Ерболат Балғабаев, Түркістан қаласының әкімі Нұрбол Тұрашбеков және облыс аумағында орналасқан Жастар ресурстық орталықтарының басшылары қатысты. Жиын барысында волонтерлердің қолдауымен Пердебек Есқұлов аталған волонтерлік қозғалыстың төрағасы болып сайланды.
– Еріктілік халқымызға жат дүние емес. Өздеріңізге белгілі, ата-бабамыздан мұра болып қалған, «асарлату» ұғымы бар. Дәстүрмен бүгінгі күннің мәселесін ұштастырып, департментіміз арқылы республикамызда Экономикалық тергеп-тексеру департаменттері арасында алғаш волонтерлік қозғалыс құруға бел будық. Қоғамымызда қаржылық алаяқтықтың құрбандары күн санап артуда. Департамент мәселенің салдарымен емес себептерімен күресуді жөн санады.
Қаржылық пирамидалар мен лудомания — дәл қазір шешімін табуы тиіс мәселе. Осы орайда біздің тараптан бастама болып отырған волонтерлік топтың қызметі ерекше болмақ. Бұл еліміздегі осы бағыттағы ең алғашқы қозғалыс болғалы тұр. Сондықтан да белсенді жастарға үміт артып, үдеден шығады деп сенім білдіремін, — деді департамент басшысы Ерболат Темірболатұлы.
Еріктілерді іріктеу 3 кезеңнен тұрмақ. Алғашқы кезеңде үміткерлер IQ тест тапсырып, екінші кезеңде эссе жазады. Соңғы кезеңде волонтер болуға үміткерлер өздері жайлы бейнеролик әзірлеуі тиіс. Осы сынақтардан сүрінбей өткендер ғана волонтерлар клубының мүшесі болып танылмақ. Берері мол жобаға арналған дөңгелек үстелге облыстағы барлық жастар орталықтарының басшылары қатысты.
Кездесуде Департамент қызметкері Гүлзия Қарсыбай волонтерлік қозғалыс жайлы баяндама жасап, қатысушылардың сұрағына жауап берді. Жиын соңында волонтерлік қозғалыстың атрибуттары – төлтаңба пен туы таныстырылды.
Айта кетейік, волонтерлік қозғалыстың басты мақсаты – облыс тұрғындарының қаржылық сауаттылығын арттыру, әлеуметтік маңызды атаулы тауарлардың бағаларына мониторинг жұмыстарын жүргізу және облыс аумағындағы қаржылық алаяқтық деңгейінің төмендеуіне үлес қосу.
