Республика күніне орай, Арыс қаласында орналасқан Тәуелсіздік стелласында Ту көтеру рәсімі өтті.
Рухты оятып, жігерді жанитын Әнұран шырқалған шараға қаламыздың зиялы қауым өкілдері мен ардагерлері, мәслихат депутаттары, әскери қызметшілер мен әкімдіктегі дербес бөлім жетекшілері және қала тұрғындары қатысты.
Қала әкімі Гүлжан Құрманбекова жиналған қауымды Республика күнімен құттықтап, Ту көтеру – аса маңызды оқиғаларға орай жасалатын ерекше рәсім екенін атап өтті.
Бүгінде қаламыздағы ең мәртебелі нысан саналатын Тәуелсіздік стелласы 2015 жылы салынған. Биіктігі – 30 метрді құрайтын тутұғырда ені – 9, ал биіктігі – 4,5 метр болатын көк Туымыз желбіреп тұр.
Арыстықтарға қала әкімі меркелік құттықтау жолдады.
Арыста қалалық Мәдениет үйінде Республика күніне орай мерекелік шара өтті. Оған қала әкімі Гүлжан Құрманбекова мен қалалық мәслихат төрағасы Қайрат Ахметов, Ардагерлер кеңесінің төрағасы Тәңірберген Әсіл және қала прокурорвы Талғат Сейдуалиев, ардагерлер ұйымының өкілдері және қала тұрғындары мен жастары қатысты.
Салтанатты жиында сөз алған қала әкімі 1990 жылдың 25-ші қазанында – Қазақстанның мемлекеттік егемендігі туралы декларация қабылданғаны, ел Тәуелсіздігі жолындағы теңдессіз құндылық екенін атап өтті.
«Сондықтан да, бұл күн – мемлекеттік маңызы зор мереке болғандықтан, біз осындай тамаша кештің куәсі болып отырмыз. Сондай-ақ, бұл күн еңбек майталмандары марапат алып, құрмет-қошеметке бөленетін кез. Олай болса, мәртебемізді асқақтатып, ұлттығымызды ұлықтайтын айтулы мереке еліміздің әрбір шаңырағына шаттық ала келсін», – деді Гүлжан Мамытқызы.
Айта кетейік, шара аясында Арыс қаласының дамуына елеулі үлес қосқан қарапайым жұмысшыдан бастап, лауазымды қызметкерге дейін марапатқа ие болып, құрмет-қошеметке бөленді.
Жиын соңы Мәдениет үйі өнерпаздарының концерттік бағдарламасына ұласты.
Сонымен бірге, Арыс қаласының әкімі Гүлжан Құрманбекова
«ҰЛТТЫҚ МЕРЕКЕ — РЕСПУБЛИКА КҮНІ ҚҰТТЫ БОЛСЫН!
Қадірлі ағайын! Құрметті жерлестер! Сіздерді Ұлттық мереке – Республика күнімен шын жүректен құттықтаймын!
Көпшілік білетіндей, 1990 жылғы 25 қазанда «Егемендік туралы» декларация қабылданды. Еліміз тәуелсіздікке бет бұрды, азат болудың алғышарты жасалды. Сондықтан біз үшін бұл күннің орны ерекше.
Өткенге көз жүгіртсек, егемендік алғаннан бері экономикамыздың нығайып, халықтың тұрмыс-тіршілігінің жақсарғанын аңғарамыз. Еліміздің тұрақты дамуына арыстықтар да зор үлес қосуда.
Өңірімізде ауыл шаруашылығы саласы дамып, өндіріс орындары, оның ішінде жеке инвесторлар есебінен тың инновациялық жобалар жүзеге асырылып жатыр. Шағын және орта бизнес, халықты әлеуметтік қорғау салаларында көптеген жетістік бар. Татулық пен жасампаз еңбектің арқасында қала мен ауылдарда жаңа шағын аудандар, мектеп, балабақша, спорт кешендері және мәдениет үйлері бой көтерді. Жолдар мен электр желілері, ауыз су құбырлары жаңартылып жатыр. Осының бәрі – Арыс бойын жайлаған жайсаң жандардың тынымсыз еңбегінің жемісі деп санаймын.
Тағы бір жағымды жаңалық. Республика күніне орай облыс орталығында өткен салтанатты шарада арыстық екі жерлесіміз «Ерен еңбегі үшін» медалімен марапатталды.
Бұл ұзақ жылдар бойы қаламыздың өркендеуі жолында еткен еңбектерінің лайықты бағалануы деп білемін.
Құрметті қауым!
Олай болса, мәртебемізді асқақтатып, ұлттығымызды ұлықтайтын айтулы мереке еліміздің әрбір шаңырағына шаттығын ала келсін.
Мереке құтты болып, Туымыз биікте желбірей берсін!», делінген құттықтауда.
