Республика күні мерекесі аясында, Түркістан облысының 5-жылдығына, ауданның мақтанышы, айтыскер ақын Жарқынбек Наушабековты еске алуға арналған “Жарқын бейне — жауһар жыр” атты республикалық ақындар айтысы өтті. Жыр додасының ашылу салтанатында аудан әкімі Арман Абдуллаев арнайы қатысып, ақындарға сәттілік тіледі. Айтыс аламанында республикаға танымал ақындармен қатар, облысымыздың, ауданымыздың жас ақындар да сынға түсті.
-Қазақ жанының айнасындай болған айтыс қай заманда болмасын қилы тағдырды, тарихымызды көрсетіп, ұлттық болмысымызды, тұрмысымызды ерекшелеп, бүгінімізді бағдарлап, келешегімізді кемелдеп отырған. Осы орайда, Наушабеков Жарқынбек Абазбекұлының құрметіне “Жарқын бейне — жауһар жыр” атты Республикалық ақындар айтысы өткізілуде. Жарқынбек Абазбекұлы жалпы айтыс өнеріне араласқалы бері 20-ға жуық бас жүлде жеңіп алып, бірнеше рет темір тұлпар иеленген. Жарқынбек Наушабеков — жалпы айтыс өнерінде өзіндік қолтаңбасы бар ақын. Бүгінде артынан ерген шәкірттері, ізбасарлары жетерлік. Атадан балаға мирас болып келген айтыс халқымыздың баға жетпес құндылықтарының бірі. Айтыс атадан балаға мирас болып келген халқымыздың рухани мәдениетінің бірі. Алдағы уақытта мұндай мәдени іс-шараларымыздың қатары көбейіп, ауданымыздың мәдени-рухани дамуы артатын болады. Ұлы бабаларымыздың жолын жалғастырып, төл өнерімізді насихаттап жүрген жүзден жүйрік мыңнан тұлпар, айтыс ақындарына сәттілік тілеймін, — деді аудан башысы.
Текті өнерді төрге оздырып, ұлт мұрасы ұлықталған жыр додасында қазіргі қоғамда орын алып жатқан жайттар, құрдастар әзілі, жеңге мен қайны, жастық жалын, іні мен аға сыйластығы көрініс тапты.
Қазылар алқасы айтыскер ақын Құралұлы Мұтар, айтыскер ақын Абдіраймов Абдіхалық, айтыскер ақын Есжанова Маржан, айтыскер ақын Қалижан Билдашевтер айтысты саралап төмендегіше :
Бас жүлде 600 мың теңге: Нұрдәулет Өмірбеков;
І орын 500 мың тенге: Айбек Қалиев;
ІІ орын 450 мың тенге:Бекарыс Шойбеков;
ІІІ орын 400 мың тенге:Анар Жаппарқұлова;
“Жыр дарабозы” номинациясы 300 мың тенге:Даниял Болысбек;
“Жыр жүйрігі” номинациясы 300 мың тенге:Нұрғали Әнапия;
Аудан әкімінің арнайы жүлдесі 300 мың тенге: Гүлзия Қалымбетова;
Ж. Наушабеков атындағы арнайы жүлде 300 мың тенге: Ержан Әміровтер иеленіп, бағалы сыйлықтар табысталды.
