Мемлекеттің қалыптасу тарихы ұлықталып, өткеннің өнегесін өскелең ұрпаққа насихаттайтын, араға 13 жыл салып тойлануы қайта қолға алынған мерекені Жетісай ауданының жұртшылығы да жоғары дәрежеде атап өтті. Қолөнер бұйымдары мен кітап, сурет көрмесін жұртшылық назарына ұсынды.
Орталық алаңда өткен мерекелік шараға аудан әкімі Серік Мамытов пен аудандық білім бөлімінің басшысы Ғазиза Шүкірбаева, зиялы қауым өкілдері мен сан саланың үздіктері қатысты. Аудан басшысы ауданның әлеуметтік-экономикалық дамуына сүбелі үлес қосып жүрген жандарды Түркістан облысының әкімі Дархан Сатыбалдының және өз атынан алғыс хаттармен марапаттады.
Мемлекеттік тарихымыздың мерейлі мерекесі болған Республика күні мерекесінің салтанатты бөлімінен соң аудан өнерпаздарының мерекелік концерттік бағдарламасы көпшілікке көтеріңкі көңіл-күй сыйлап, Жетісай аспанын асқақ әнге бөледі.
Айта кетейік, «Республика күні – елдің мемлекет құру жолындағы тарихи қадамының символы болуы керек. Әрине, Тәуелсіздік күнінің бастапқы мәні сақталады. Бұл күн мемлекеттік мереке болып қала береді. Бірақ, тәуелсіздік алуға зор үлес қосқан ұлттық батырларымызға тағзым күні ретінде атап өтілуі керек» деген Мемлекет басшысы Қасым-Жомарт Тоқаевтың бастамасымен «25 қазан – Республика күні» мерекесі болып бекітілді.
