Биыл елімізде кітапханашылар күні кең көлемде аталып өутде. Түркістан облысы мәдениет және туризм басқармасының басшысы Әзімхан Қойлыбаев ардагер кітапханашылармен кездесіп, кәсіби мерекелерімен құттықтады. Мерекелік басқосуға Шәрбану Дінәсілова, Зоя Бекежанова, Закира Пәрімбекова, Несібелі Биболатова, Пернекүл Нәлтаева, Гүлмайра Нысанова, Айнагүл Рыскелді, Гүлсін Дәулетбаева, Светлана Шишкина, Жанат Шардарбекова қатысты.
– Осындағы әрбіріңіз кітапхана үшін, оқырман мен кітап үшін аянбай еткен еңбектеріңіз, әлі де осы салада қызмет етіп келе жатқандарыңыз белгілі. Қызметтік өмірін кітапхана саласына арнаған ардагерлеріміз бүгінгі күні таптырмас қазына, себебі қаншама зиялы қауым өкілдерімен кездесулер өткізу, оқырманмен жұмыстың жаңа форматтарын, формаларын ойлап табу, кітапхана жұмысын үйлестіру – оңай жұмыс емес. Сіздерді қазына деуімнің тағы бір себебі, сіздер тау тұлғалы қаламгерлердің кітаптарын оқырманға ұсынып, оқылу деңгейін көтердіңіздер. Бүгінгі оқырманның ақпарат қабылдауы мүлде басқа. Жылдамдық, ерекшелік, қысқа ақпарат бүгінгі оқырман талабы. Технология, түрлі әлеуметтік желілер дамыған кезде оқырманның дәстүрлі кітапқа дегене сұранысын жоғалтпай керісінше арттыру кітапханашылардың ерен еңбегі деп білем. Өскелең ұрпағымыздың шырағын жарық жағатын игі бастамаларыңыз жалғасын таба берсін, – деген Әзімхан Серікұлы еңбегінің зейнетін көріп жатқан ерекше мамандық иелеріне құрмет көрсетіп, «Кітапхана ісінің ардагері» және «Еңбек даңқы» төсбелгісі мен облыс әкімі орынбасарының және өзінің атынан алғыс хат табыстады.
Таяуда Астанадада 24 қазан – Кітапханашылар күніне орай ҚР Мәдениет және ақпарат министрлігінің ұйымдастыруымен өткен мерекелік шарада ҚР Мәдениет және ақпарат министрі Аида Балаева республика кітапханашыларын құттықтап, кітапхана ісінің дамуына қосқан зор үлестері үшін бірқатар мамандарды марапаттаған еді. Соның ішінде Түркістан облысының кітапханашысы Айнагүл Рыскелді мен Гүлсін Дәулетбаева «Мәдениет саласының үздігі» төсбелгісіне ие болған еді.
Басқармалар үйі ғимаратында жақында ашылған ашық әкімдіктегі ашық кітапханада өткен кездесуде ардагер кітапханашылар басқарма басшысына алғысын жеткізіп, облыс орталығына айналған Түркістанның жаңа келбетін, мәдени бағытта орын алып жатқан жетістіктерін тілге тиек етті. Әрі қарай мерекелік «Фараб» кітапханасында жалғасын табады.
