«Орамал таққан келіншек»… Біздің сүйіп тыңдайтын әннің аты осылай аталады. Бүтін бір ұлттың бірегей этнографиясын бір әнмен танытып, әлемге насихатталып жатса, мұны өнердің құдыреті демей, не дейміз?!
Иә, жыр әлемі деп аталатын, рухани бауырлар бас қосқан, керемет бір әлем бар. Сол әлемнің «дертімен» ауырған адамдар жиі бас қосып тұрамыз. Сондай басқосулар жаңа туындылардың жарыққа шығуына себепкер болып жатады. Біз бүгін әңгімеге арқау етіп отырған жаңа ән де сондай кездесулерден кейін туған дәргейлі дүниелердің бірі. Иә, жаңа әннің тууына себепкер болған Раиса да қарапайым қазақтың қызы. Аздап өлең жазады, өзіндік өнерімен танылып жүр. Ең бастысы, қазақ қызына тән инабаттылық пен ибалылық бойынан көрініп тұрады. Иә, сол құрбымыздың көркем мінезіне бір сүйсінсек, өзіне жарастыра, тастамай тартып жүретін әдемі орамалы үшін тағы да тамсана қараймыз. Раиса Аханқызының осы сәні мен салтанатына көбіміз қызықсақ та, оның сол бейнесін жырға қосу түркістандық ақын Сайлаухан Жолановқа бұйырыпты. «Орамал тартқан келіншектің» сөзін Сайлаухан ақын жазса, әні – алматылық сазгер Әлібек Сыздықұлы ағамыздікі. Иә, марқұм Қайрат Дүйсен-Парман ағамыз негізін қалаған Әлем халықтары жазушылар одағы өнерсүйер жандардың қатарын біршама арттыра түсті. Жаңа таныстар, жаңа шығармашылық деңгей біздің бір-бірін қолдаған рухани ортамызға жаңа серпін беріп, күннен-күнге қанаттана бердік.
Қазақ орамалының қасиетін қастерлеуге бекінген ақын келіншектің ибалы мінезі көптеген жастарға үлгі болып жүргенін де айта кетейік. Қазақтың ибалы да инабатты келіншегіне жыр арнау арқылы орамалдың қасиетін дәріптеген ақынның сезімталдығы да тәнті етпей қоймады.
Күз. Сағыныштың лебі есіп сары жапырақтар желмен тербеліп төмен құлдилайды. Ақырын ескен салқын самалмен әдемі әуен естіледі. Қайырмасын іштей қайталай бердім. «Анадай асыл аяулы болсын, Әжедей кемсең көңілшек. Бақытың сондай баянды болсын, Орамал таққан келіншек». Қазақ келіншегіне осыдан артық қандай жақсы тілек бар?!
А.СЛАМОВА.
Шардара ауданы.
