Президент Қасым-Жомарт Тоқаев Қазақстан халқына Жолдауында да «Ауыл шаруашылығын дамыту – негізгі проблеманың бірі. Осы саладағы ахуал мемлекетіміздің азық-түлік қауіпсіздігіне тікелей әсер етеді» деп нақтылап айтты.
Сонымен бірге, Мемлекет басшысы өз Жолдауында агроөнеркәсіптік кешенді дамыту, соның ішінде агроөнеркәсіптік кешенін субсидиялаудың ұзақ мерзімді жаңа тәсілдерін әзірлеуді тапсырды. Кәсіпкерлерге жерді жедел әрі ашық бөлудің тиімді әдістерін тұжырымдау жөнінде Үкімет алдына міндеттер қойған еді.
Осы орайда, Түлкібас ауданында балық шаруашылығына қызығушылар қатары артып келеді.
Бұлай дейтінініміз биылдың өзінде аудан аумағындағы балық өсірумен айналысатын шаруашылықтар қатарына екі нысан қосылмақ.
Соның бірі ЖК «Эко Балық». Кәсіпкер Байжанов Хашымбек Балықты ауылының шетіндегі өз жерінің 3 га аумағына екі жасанды тоғанды қазып қойған. Қазан айының орта тұсында Жамбыл облысынан 60 мың дана карп, сазан, ақ амур балықтарының шабақтарын алып, көлге жіберуді жоспарлап отыр.
Аталған кәсіпкермен көл басында кездескен Түлкібас ауданының әкімі Нұржан Ізтілеуов аудан әкімдігі тарапынан Заң талаптарына сай барлық қолдаулар болатындығын жеткізіп, кәсіпкердің өтінішіне сәйкес жердің қажетті құжаттарын толық рәсімдеуге және мемлекеттен «Ауыл аманаты» бағдарламасы шеңберінде кәсібін ұлғайтуға жеңілдетілген пайызбен несие алып беруге көмек берілетінін атап өтті.
Содан соң аудан басшысы дәл осындай кәсіпті Састөбе кентіндегі көлде дөнгелетуге бел буған кәсіпкер Парманов Мұратпен нысан басында кездесіп, алдағы жоспарларымен танысты. Састөбе кентіндегі көлді жалға алып, оған 150 мың дана сазан, карп балығының шабақтарын жіберуді көздеп отырған кәсіпкер қазіргі таңда Заң талаптарына сай көл аумағын қоршап, ішін тазалау жұмыстарын жүргізуде.
Аудан басшысы мемлекеттік нысанды жалға алып отырған кәсіпкерге көлдің айналасын көгалдандырып, жергілікті тұрғындардың жүріп-тұруына ыңғайлы жағдай жасауды міндеттеді.
Келесі кезекте Нұржан Жақсылықұлы Машат ауылындағы «Жеті үй» шаруа қожалығының көліне табан тіреп, ондағы атқарылып жатқан жұмыстар барысымен танысты.
Осыдан екі жыл бұрын үй маңынан жасанды тоған жасап, оғын 16 мың дана сазан, карп, ақ амур, дөнмаңдай балығының шабағын жіберген Дос Ахатаев есімді кәсіпкер келер жылы алғашқы өнімін сауда қатарларына шығаруды көздеп отыр. Сонымен қатар, кәсіпкер көл аумағын абаттандырып, ол жерден «сақ» моншасы мен киіз үйлер тігіп, демалыс орның ашуды жоспарлауда.
Аудан әкімі кәсіпкердің жұмысын оң бағалап, ісіне сәттілік тіледі. Және кәсіпкердің өтінішіне сәйкес көл маңынан өтіп жатқан Машат өзенінің жағасын бекітіп беруге тиісті жұмыстар атқарылатынын атап өтті.
Айта кетерлік, бүгінгі таңда Түлкібас ауданында балық шаруашылығымен айналысатын кәсіпкерлік нысанындар саны 14 жетіп отыр. Оларда бекіре, фарель, сазан, карп, дөнмаңдай, ақ амур балығының түрлері өсірілуде.
