Мемлекет басшысы Қасым-Жомарт Кемелұлы Тоқаевтың Қазақстан халқына Жолдауында жуық арада жүзеге асырылатын саяси реформалардың жаңа бағдарламасы мен әлеуметтік-экономикалық бағытта атқарылатын іс-шаралар туралы айтты. Мемлекет Басшысының айтуынша бұл реформалар Жаңа, Әділетті Қазақстанды құрудағы аса маңызды қадамдар болмақ.
Жолдауда көтерілген басты мәселелер – қазақстандықтардың табысын арттыруға, әлеуметтік жағдайын жақсартуға, халықтың өмір сүруіне қолайлы орта құруға және орта және шағын кәсіпкерлікті одан әрі дамытуға, ел экономикасын модернизациялауға, еңбек өнімділігін арттыруға бағытталған.
Түркістан облысында 2022 жылы агроөнеркәсіптік кешен субъектілерін қолдауға 30,3 млрд. теңге бөлінсе, биылғы жылы қолдау көлемі 30%-ға артып 40 млрд. теңгеге жетті. Бұл туралы брифингте облыстық ауыл шаруашылығы басқарма басшысының м.у.а. Әлібек Әбдіхалықұлы мәлімдеді.
Спикердің айтуынша, субсидия – тыңайтқыштарға, жылыжайды жылыту жүйесіне, дақыл өндірісіне, агроқұрылым жұмысын жандандыруға берілмек.
— Облыстың аграрлық секторында 74 мың агроқұрылым жұмыс істейді. Агроқұрылымдардың шығынын өтеу үшін 20% субсидия төленеді. Басым дақылдардың өндірісін субсидиялау бағдарламасы арқылы қайта өңдеуге өткізілген дәндік жүгеріге 10 мың теңге және мақсарыға 20 мың теңге қаржы төлеу жоспарланған. Аталған бағдарлама арқылы 432,1 млн. теңге қаржы қарастырылды. Ал «Тыңайтқыштардың құнын субсидиялау» бағдарламасы бойынша бүгінгі күнге 5,2 млрд теңге субсидия төленіп, 8 819 агроқұрылым мемлекеттік қолдауға ие болды. Бұдан бөлек, биылғы жылы облыс әкімдігінің ұсынысымен Үкімет тарапынан жылыжай шаруашылықтарын жылыту маусымында субсидиялаудың жаңа тетігі енгізілді. Бағдарлама арқылы өнеркәсіптік және фермерлік жылыжайларда пайдаланылған электр энергиясы, көмір және газ шығындары ішінара субсидиялау көзделген, — деді спикер.
Жалпы нарықты азық-түлік өнімдерімен толықтыру, өнімдердің бәсекеге қабілеттілігін арттыру мақсатында 2021-2025 жылға дейінгі кезеңде агроөнеркәсіп кешені саласында жалпы құны 237,5 млрд. теңгені құрайтын 97 инвестициялық жобаны іске асыру көзделген. Осы орайда 2021-2022 жылдары 48,4 млрд. теңгеге 70 жоба іске асырылды. Ал биылғы жылдың 8 айында аталған салада құны 10,6 млрд. теңгеге 26 жоба жүзеге асырылды.
