Елімізде болып жатқан саяси жаңғырулар енді экономикалық өзгерістерге ұласпақ. Президентіміз өз Жолдауында экономикалық дамудың нақты бес бағдарын айқындап, дамудың даңғыл жолын көрсетті.
Жаңа экономикалық саясат, нақты секторды дамыту, стратегиялық инвестиция, Мемлекеттік басқару ісін қайта жаңғырту, Заң мен тәртіп – Жаңа Қазақстанның бес тұғырына айналмақ.
Түркістан қаласында Әмір Темір атындағы 300 орындық мектептің құрылысы жүріп жатыр. Мектеп құрылысы жыл соңына дейін аяқталады.
Түркістан облысының әкімі Дархан Сатыбалды мердігерлермен кездесіп, жұмыс барысын пысықтады. Құрылыс сапасына басты назар аударуды тапсырды.
Сонымен қатар облыс басшысы қала аумағын жаяу аралап, бірқатар нысандарда жүріп жатқан жұмыс барысын бақылады. Сондай-ақ «Жеті ата» қақпасында болды. Тарихта киелі Түркістан қаласының 4 қақпасы жайлы айтылады. Сол 4 қақпаның бірі Қожа Ахмет Ясауи кесенесінен 620 метр қашықтықта орналасқан «Жеті ата» қақпасы. Бұл — қалаға келуші туристердің жиі баратын жері.
Қақпа 1928-1932жж. дейін сақталып келген. 2009 жылы қайта қалпына келтірілген. Мазараттың атауы Қожа Ахмет Ясауидің осында жерленген жеті мүридінің (шәкірті) кесенесімен байланысты.
Түркістан қаласы 6 секторға бөлінген. Құрылған секторларда қала аумағындағы өзекті мәселелерді бақылауға алып, жүйелі түрде шешуге ықпал етеді. Атап айтсақ, олар «Яссы», «Сауран», «Шауғар», «Бекзат», «Отырар», «Бірлік» секторлары. Халықпен жұмыс жүргізу секторларында 30-дан аса азамат жұмыспен қамтылып, тұрғындармен тығыз байланыс орнатуда.
Қаладағы құрылыстарды аралау барысында Түркістан облысының әкімі Дархан Сатыбалды «Шауғар» секторының жұмысымен танысты. Сектор қызметкерлері халықпен коммуналдық мәселелер, тұрғын үй, атаулы әлеуметтік көмек, табиғи газды пайдалану туралы ақпараттар ұсынып, көшелердің көгалдандырылуы, абаттандырылуы, тазалығының үйлестірілуін қамтамасыз етеді. Бұнымен қоса, аумақтағы тұрғындардың мәселелерін шешу үшін жүйелі жұмыстар жүргізіледі. Облыс әкімі мамандармен тілдесіп, тұрғындар тарапынан көтерілетін мәселелермен танысты.
Алты сектор қала әкімдігінің 109 – Бірыңғай байланыс орталығымен бірлесе отырып, мониторингтік жұмыстар арқылы халықтың өтініштері, мәселелерін шешу шаралары қолға алынуда. Тұрғындармен кездесулер өткізіліп, халықтың мұң-мұқтажы сараланып, зерделеніп тиісті іс шаралар атқарылады.
Түркістан облысының әкімі Дархан Сатыбалды облыс орталығындағы құрылыс алаңдарын аралап, мердігерлермен кездесті. Жауапты сала басшыларына тапсырмалар берді. Түркістанда кәріз жүйесінің құрылысы жүріп жатыр. Облыс әкімі М.Әбенова көшесіндегі кәріз жүйесінің құрылыс жұмыстарымен танысты. Қазіргі таңда мұнда қолданыстағы пластик кәріз құбыры толықтай есептелген қуаттылығымен жұмыс істеуде.
Бастапқы жобадан бөлек жүргізілген коттедждер, «Керуен сарай» тұрғын үй кешені, мешіт нысандары іске қосылған соң жүйе арқылы өтетін сарқынды су мөлшері ұлғайған. Соның салдарынан кәріз толып, тұтынушылардың наразылығын туындатқан.
Артық суды жаңа жоба бойынша салынатын темірбетон құбырмен өткізу арқылы мәдени орталықтағы кәріз жүйесіндегі орын алған мәселе шешімін табады. Темірбетон құбырды 1,6 шақырымға жүргізу көзделген.
«Яссы» мөлтек ауданындағы Ыждыхат тұрғын алабын сарқынды су жүйесімен қамтамасыз ету құрылысының І кезеңі бойынша 76 шақырымға құбыр жүргізілген. Кезекті аралау барысында облыс әкіміне ІІ кезең жобасы ұсынылды.
Құрылыс алаңы 63 шақырымға жоспарланып, нақты 43,6 шақырымы орындалған. Құрылыс жұмыстары аяқталған соң 7480 тұрғын үй кәріз жүйесіне қосылады деп күтілуде. Жобаны тапсыру 2024 жылдың желтоқсанына жоспарланған.
Қала аумағында орталықтандырылған кәріз жүйесімен 32,2% не 12 мыңнан астам абонент қамтылған. Қуаттылығы тәулігіне 20 000 М3 сарқынды су тазарту имараты бар. Қабылданып жатқан сарқынды су көлемі тәулігіне 4 500-5 000 М3, 27 дана КНС, 127 шақырым сарқынды су құбырлары қолданыста.
2023 жылға өтпелі жалпы 7 нысанның құрылысы жүргізілуде. Биыл кәріз жүйесімен қамту көрсеткіші 36,3 %-ға жетеді деп күтілуде. 5 нысан (20 244 абонент) бойынша құжаттар қаржыландыруға ұсынылған. 2 нысанның жобалау-сметалық құжаттары әзірленуде. Нәтижесінде кәріз жүйесімен қамту көрсеткішін 95 пайызға жеткізу жоспарлануда.
