Келес ауданының әкімі Жәнібек Ағыбаев аудан аумағындағы ауылдық елді мекендерді аралап, жергілікті тұрғындармен кездесу өткізуде. Бүгін аудан басшысы Ұшқын ауылдық округіне табан тіреп, жергілікті тұрғындардың уәжіне құлақ түрді. Алдымен өткен кездесуде көтерілген түйіткілдердің шешілу барысына тоқталған аудан әкімі нақты жеті мәселенің шешімі табылғанын атап өтті.
— Мемлекет басшысының Жарлығына сәйкес өздеріңізбен жыл басынан бері бүгін үшінші рет кездесіп отырмыз. Өткен бас қосуларда маңызды мәселелер көтерілген еді. Бүгінгі күні соның жетеуі нақты шешімін тапты. Соладың қатарында Достық ауылындағы ауыз су ұңғымасы насосын ауыстыру мәселесі көтерілген болатын. Аталған су насосы ауыстырылып, ауыл тұрғындарының пайдалануына берілді. Сондай-ақ Ұшқын ауылындағы C.Сейфуллин көшесі (600 метр) асфальтталса, Достық ауылындағы Жаңажол, Достық, Озат, Мақташы және Ш.Құдайбердіұлы көшелеріне (1,9 шақырым) шағал төселді, — деді аудан әкімі.
Ұшқындағы жоспарлы жұмыстардың қатарында Өзбекстан Республикасынан бастау алатын В-24 және В-15 каналдарын механикалық тазалау мәселесі бар болатын. Қазіргі таңға В-24 каналы механикалық тазалаудан өткізілді. В-15 каналын механикалық тазалау жұмыстары қазан айына жоспарлануда. Қоралас ауылындағы бастауыш мектеп маңына жол кедергісін (леж.полицейский) орнату мәселесі өз шешімін тапты. Бүгінгі таңда Қоралас ауылындағы Ащысай қашыртқысының арнасы «Тұран су» МКК тарапынан түзуленіп, жағасын тау тастарымен бекемдеу жұмыстары жүргізілуде. Сонымен қатар, Ұшқын ауылындағы Сейфуллин, Жамбыл, Саттаров және Қ.Сатбаев көшелері жарықтандыру қондырғылары демеушілер есебінен орнатылды.
Кездесу барысында тұрғындар “Ауыл аманаты” жобасына, ағын су, инфрақұрылым жүйелеріне қатысты сұрақтарын жолдап, аудан әкімі тарапынан тиісті жауаптары берілді.
