Келес ауданында мәдениет мекемелері жоқ халық саны мыңнан асатын 18 елді мекен бар. Ауданда 5 ауылдық округ орталықтарымен халық саны көп орналасқан елді мекендерге мәдениет нысандарын салу үшін жобалық-сметалық құжаттары әзірленіп, «Ауыл-ел бесігі» бағдарламасына ұсынылған. 2023-2024 жылдарға «Ауыл-ел бесігі» бағдарламасына ұсынылған нысандар ішінде Жүзімдік ауылдық мәдениет үйінің құрылысы да бар. Бұл туралы Келес ауданының әкімі Жәнібек Ағыбаев Жүзімдік ауылдық округінің тұрғындарымен кездесуінде мәлім етті.
— Бүгін, Жүзімдік ауылдық округіне өздеріңізбен жүздесіп, маңызды мәселелерді бірге талқылау үшін арнайы келіп отырмыз. Бұдан алдынғы кездесулерде өздеріңіз тарапынан маңызды 6 мәселе көтерілген болатын. Сол мәселелерді шешу бойынша арнайы іс-шара жоспары жасалып, жүйелі жұмыстар жүргізілуде. Солардың бірі Оңтүстік елді мекенінде ауыз су құрылысын жүргізу үшін жобалық-сметалық құжаттамалары әзірленген. Мемлекеттік сараптама қорытындысы алынып, бюджеттік өтінім ұсынылды. Сонымен қатар Ақсу елді мекеніндегі Штабканал көшесін орта жөңдеу үшін жобалық-сметалық құжаттары әзірленуде. Тиісті құжаттары аяқталған соң, жоспарға енгізілетін болады, — деді аудан басшысы.
Кездесу барысында аудан әкімі Жүзімдік елді мекенінен дәрігерлік амбулатория салу үшін 0,50 га жер бөлінгенін, қазіргі таңда облыстық денсаулық сақтау басқармасы тарапынан жобалық-сметалық құжаттары істеліп жатқанын атап өтті. Сондай-ақ Жүзімдік елді мекенінің ауыз суын теңгерімге алу бойынша ауданда ауыз сумен айналысатын мекеме айқындалғанын, бүгінде аталған мекеме тарапынан теңгерімге алу және тариф бекіту жұмыстары жүргізіліп жатқанын жеткізді.
Аудан әкімі тұрғындармен кездесу барысында ауданның әлеуметтік-экономикалық даму көрсеткіштеріне қысқаша тоқталып, тұрғындар тарапынан көтерілген сауалдарға жауап берді. Өзекті мәселелер бойынша жауапты мекеме басшыларына тапсырмалар жүктеп, орындалуын бақылауға қойды.
