Келес ауданында Түркістан облыстық «Фараб» әмбебап-ғылыми кітапханасының ұйымдастыруымен «Open Library-2023» атты ашық есік күнінің эстафетасы жалғасты. Шараның мақсаты – оқырманмен байланысты нығайту, кітап оқуға үгіттеу, кітапханашылардың шығармашылық жетістіктерін айқындау.
Шараны Келес ауданы әкімінің орынбасары Дәурен Сариев ашып беріп, ұйымдастырушыларға алғысын білдірді. Сондай-ақ, Түркістан облыстық «Фараб» әмбебап-ғылыми кітапханасының директоры Жанат Шардарбекова кітап эстафетасының маңыздылығына тоқталды.
Аталмыш эстафетаны Келес аудандық орталықтандырылған кітапханалар жүйесі Ордабасы ауданынан қабыл алып, Сарыағаш ауданына жолдады. Шара барысында М.Жұмабаев атындағы Ақмола облыстық әмбебап-ғылыми кітапханасы тікелей эфирге шығып, түрлі кітап көрмелері көпшілік назарына ұсынылды.
